KPA ta reacciona:
ORANJESTAD (AAN): Cuerpo Policial Aruba a emiti un comunicado di prensa unda ta expresa lo siguiente: "Nos ta haya lamentabel cu nos ta habri aña 2025 cu e medio di comunicacion 24.ora.com ariba e prome dia di aña ta saca noticia negativo y NO corecto di nos di Cuerpo Policial Aruba.
Nos ta cita e articulo cu e medio aki a publica riba su plataforma: “Cuerpo policial den un decadencia: Un transporte policial pa henter Aruba”.
No solamente e NO ta cuadra cu e berdad pero e ta daña imagen di nos Cuerpo Policial.
Cuerpo Policial semper ta dispuesto pa contesta tur pregunta t’e na unda cu ta nos alcance. Tambe nos portanan ta habri pa tur medionan di comunicacion manera semper nos sa di haci. Nos semper ta habri pa esaki y ta haya tristo pa mira no a haci uzo di e canalnan pa haya e informacion corecto.
Naturalmente no tur cos ta bayendo manera cu nos lo desea, pero nos ta trahando duro den nos organisacion pa por trece tur cos basicamente na ordo manera mester ta.
Pesey tin un lista largo internamente cu tin prioridad. Nos transporte policial cu NO yama un “dog catcher” pasobra ta hende nos ta transporta ta un di nan. Nos transporte policialnan ta den tampara pa haya un flota nobo y adecua abase di informacion di e agente policial mes. Tur esaki ta den desaroyo pa e aña aki.
Como tambe nos tin cu enfoca ariba diferente puntonan manera: yena y baha e scarcedad di personal cu ta casi 50% di nos organisacion. Aparte di esey nos ta inverti den bon recursonan, estudionan y materialnan manera auto, radio di polis, uniform como tambe edificionan pa menciona algun.
Pa haci esaki posibel nos ta depende di otro medionan pa logra esaki. Pero nos a haci esaki posibel den 2024 y a sa di bin cu auto di polis nobo, portofoon nobo y edificionan, y hopi mas. Cu enfoke mehora e calidad di nos organisacion tanto paden y pafor.
Pero NO ta tur cos por pasa pareu".
