Warda di Polis di Savaneta a yega e punto di mas halto y pronto lo keda finalisa

Ministro Rocco Tjon tabata presente

ORANJESTAD (AAN): Recientemente, minister di Husticia y Asuntonan Social sr. Rocco Tjon conhuntamente cu Korpschef sr. Ramon Arnhem, tabata presente na e “spantenbier” di warda di polis di savaneta. E edificio a yega e punto di mas halto, pues a haya un rondleiding di monumentenbureau, kende ta encarga cu e proyecto di restauracion di e edificio, conhuntamente cu e contratista esta ALBO. E avansenan ta canando segun e planificacion, y oktober binidero e edificio aki lo keda finalisa.

   Manera ta conoci, Cuerpo Policial di Aruba su tarea primordial ta pa garantisa siguridad, y pa nan por haci esaki, nos mester percura pa e structura di e organizacion ta ekipa pa por brinda siguridad. A base di esaki, ya caba ta bezig ta adapta henter e structura, y ta percura pa tur e trahadonan ta bon ekipa cu material. Hopi inversion a worde haci caba den e diferente tiponan di material cu nan tin mester. Pues, importante ta pa crea e condicionnan di trabao adecuado, pa e Agentenan por eherce nan trabao debidamente, y percura pa e renobacionnan y e pasonan infrastrucutural tuma luga.

   Den cuadro di renobacionnan cu a tuma luga caba, por menciona cu ya a percura pa warda di Polis di playa por muda pa un warda nobo, warda di polis di Noord a worde renoba y a construi Plaza Tino Ruiz, Family Justice Center lo keda cla dentro di dos luna, Operation Command Center na Savaneta tambe lo keda cla den e proximo luna nos dilanti. Banda di esaki, e proyecto di Ex-Codemsa a inicia tambe pa comberti esaki den un centro di husticia, pues hopi inversionnan ta tumando luga pa asina percura cu nos Agentenan Policial por eherce nan trabao debidamente.

   Segun Korpschef sr. Arnhem, e ta hopi contento cu tur e avansenan cu ta tumando luga pa loke ta Cuerpo Policial di Aruba, mirando cu esaki ta un punto di importancia pa e Agentenan Policial por eherce nan trabao mucho mas trankil y den un bon ambiente. “Dit is wat je voor je mensen wil, en dit is wat je van leiderschap verwacht, tur mi coleganan ta hopi contento” ta e palabranan di Alto Comisario sr. Arnhem, caminda e ta apluadi Minister Tjon pa e bon trabao ehecuta pa cu Cuerpo Policial di Aruba.

   Por ultimo, e minister Tjon a expresa cu e ta sumamente satisfecho di wak tur e avansenan pa loke ta trata Cuerpo Policial di Aruba, y ta gradici specificamente e ekipo di bedrijfsvoering di Cuerpo Policial pa hunga un rol importante pa e proyectonan aki por worde ehecuta. Tambe un danki na ministerio di husticia y asuntonan social e ekipo di finanzas, monumentenbureau como tambe ALBO, pa e proyecto aki por keda finalisa lo mas lihe cu ta posibel.