ORANJESTAD (AAN): E rapport oficial di Polis a drenta pa splica loke nan a topa cune na Sero Patrishi riba Diaranson atardi,
ora cu a bay check un persona den Toyota Starlet ta bende droga.
Tabata exactamente 5:15 pm cu unidadnan di Polis a ser manda Sero Patrishi pa check e Toyota Starlet blanco aki cu ta bendiendo droga den dia cla. Polis di Playa a yega y topa un Toyota Starlet para riba acera den e caya na compleho di edificionan na Sero Patrishi. Tambe a mira un grupo di hoben cu tabata rond di e auto, y ora cu nan a mira Polis, nan tur a spat fo’i otro y cana bay den diferente direccion.
Polis a mira cu un di e hobennan a subi tereno di un cas, y despues a bin bek pafo y a cana bay na e auto. Polis a wordo acerca door d un homber kende a bisa cu e ta doño di e auto. Polis a puntre pa un cedula valido, y aki el a mustra nan su rijbewijs. E homber di inicial L., boluntariamente a declara cu e tin algun pito di marihuana den su auto, y el a duna permiso pa nan rista su auto.
Cu yegada di mas unidad policial, agentenan a dicidi na bay rista tur persona presente den e area e momento ey. Prome cu a listr’e, e homber L. a pone su schoudertas riba e muraya di cura. Durante ristamento na su paña, a haya nada. Ora cu a bay controla e schoudertas, a bin haya varios papel di placa y tambe droga. Den e Toyota Starlet a bin haya den dashboard, un saco di plastico ‘Ziplock’ conteniendo varios sakito di plastico transparente, cu marihuana den nan. Tambe tabatin sakitonan di plastico transparente cu puiro parecido na cocaina, tambe un grinder preto cu tambe tin yerba di marihuana aden.
Debi cu e informe original ta cu e persona di e Toyota Starlet blanco ta bende droga, y cu a haya droga eynan, ta mustra cu e homber di inicial C. cu Polisnan na comienso a mira ta cana bay cu un postura schuw, lo a bay sconde droga riba tereno di un cas na Srero Patrishi. Dilanti e adres ey tabatin varios persona, incluyendo e doño di cas. El a informa Polis cu e hoben C. ey no ta biba eynan, y cu kizas el a bay sconde algo ora cu el a mira unidad di Polis yega.
Polis a haya permiso pa subi e tererno di cas pa listra. Patras di e cas, agentenan a bin topa cu un saco transparente conteniendo hopi placa y droga poni riba mesa cu tin eytras. Doño a bisa cu e ta biba su so, y cu e saco ey cu placa y droga ta pertenece na C., pasobra el a mire cana bay patras di su cas cu algo den su brazanan.
Relaciona cu esaki, manera por mira riba e potret, Polis a detene e homber di inicial C., relaciona cu violacion di articulonan 3 y 4 di Ley di Droga. E droga hunto cu e placa cash a wordo confisca, y entrega na Unit Narcotica di Cuerpo Policial.
