ORANJESTAD (AAN): Desde Diaranzon atardi, Warda di Polis na Playa a muda y ta den un otro edificio.
Nan a bandona centro di ciudad, y a bay net na rand, riba caminda di Paardenbaaistraat. E ta awor den e edificio net banda di e rotonde chikito cu tin cerca di Cas di Partido AVP.
Paardenbaaistraat 12 ta e edificio unda den pasado tabatin den decada di 1970 te cu 1988, e compania di real estate, ‘Andeco NV’ ubica aki. Atravez di tempo, e.o. Consulado Venezolano tambe a bay eyden.
Pero awor na 2023 despues di trabao di renobacion, riba Diaranzon atardi 4:00 pm, e edificio a habri portanan pa publico oficialmente como ‘Warda di Polis di Playa’.
Tabata algun dia cu mester a muda e departamentonan concerni na e warda nobo aki. Awor aki e mudamento a keda cla y por cuminsa brinda servicio na nos comunidad.
Algun departamento cu a bin ubica aki ta (*) Agentenan policial di Oranjestad. (*) Polis di bario Oranjestad. (*) Departamento di Permiso Oranjestad. (*) Personal Administrativo di Oranjestad.
Esakinan ta e cuater departamentonan cu ta ubica aki y ta brindando servicio na nos comunidad. Locual ta trata JZP (Jeugd en Zeden Politie) y Bureau Slachtofferhulp lo bay muda dentro di poco na otro edificio. Pronto Polis lo anuncia esaki.
Pues ya caba ciudadanonan lo por pasa na Warda di Polis Oranjestad situa na Paardenbaaistraat 12 pa asistencia policial.
Algo bon di e localidad aki ta, cu Polis tin acceso rapido na varios caminda pa asina mobiliza mas rapido.
