ORANJESTAD (AAN): Tabata Diahuebs anochi cu un unidad di Polis di Playa a ser manda na un adres na Pavia pa check un caso serio di hincamento.
Ora cu Polis a yega na e cas, nan a wordo acerca pa un señora basta histerico, kende a declara cu algun minuut prome un amigo a wordo maltrata pa hende desconoci. Esaki a escala ora cu nan a usa un obheto skerpi pa hink’e na su lomba.
Polis a mira cu e cas y e tereno di santo tin hopi mancha di sanger. E señora a indica cu e amigo a sali e Diahuebs ey, y banda di 11:15 pm el a tende ta yega cas. Despues el a tende un discusion a start pafo di e cas.
Esaki a pone e señora lanta bay mira na e bentana pa check kico ta pasando. Aki el a bin mira cu e amigo ta pustando boca cu dos hoben. Uno di nan tin un hoodie preto cu carson shinishi largo. E hoben aki tin color di cuero scur, y tin estatura largo.
Esey a pone e señora sali for di porta patras y a cuminza grita e amigo pa e drenta cas pa evita mas problema. E amigo a bira y a cuminza cana direccion di e señora. Ora di yega cerca dje, el a kita su T-Shirt y aki el a bin nota cu su amigo ta sangrando na lomba.
Polis a pone tanto Recherche di Playa, y oficialnan forensico di BFTO pa yega na e lugar pa start un investigacion serio di loke a pasa na Pavia.
