A detene 9 persona abordo di boto sospechoso cu intencion di drenta Aruba

Durante persecusion a tira pakinan den lama

ORANJESTAD (AAN):  Diabierna 14 di april den oranan di madruga Wardacosta den bon colaboracion cu Cuerpo Policial Aruba ta intercepta un boto cu a purba drenta Aruba den e parti noord.

            Despues di un persecucion caminda mester a los tiro di advertencia y tiro dirigi riba e motornan di e boto pa Wardacosta por a logra para e boto.

            Durante e persecucion e personanan abordo di e boto sospechoso a tira pakinan den lama. Wardacosta a logra detene 9 persona abordo di e boto sospechoso cu tabatin intencion di drenta Aruba. Despues di un buskeda riba lama cu e avion Dash, e helicopter y un Metal Shark di Wardacosta a bin encontra un cantidad substancial di paketenan conteniendo marihuana.

            Diabierna 21 di april un biaha mas, panoord di Aruba, Wardacosta un biaha mas den bon colaboracion cu Cuerpo Policial Aruba ta intercepta un otro boto cu 9 persona abordo cu a intenta di drenta Aruba na un manera clandestino.

            Den tur dos e casonan e personanan ta procedente di Venezuela. E dos casonan a ser hcsi den bon cooperacion cu Cuerpo Policial Aruba. E personanan y e droga a ser entrega na KPA.

=