Vehiculo Brilliance SUV a bolter ora di dal tras di un Van

ORANJESTAD (AAN): Un accident basta violento a keda registra riba caminda di Noord pa Westpunt, net na e cruzada pa bay Bakval cerca di Noord Supermarket.

   Polis ta investigando con exacto e accident a socede, aunke tin testigo cu a bisa cu un vehiculo SUV di fabricacion chines di marca Brilliance V5 color blauw scur cu tabata bayendo panort cu number A-63784, no a regla su velocidad na tempo, y a bay dal masha duro mes tras di un Toyota Minivan cu number A-47191.

    Despues di a dal, e Brilliance a baha na banda drechi di caminda, y a bolter pa finalmente finaliza bek riba su cuatro wielnan.

   E otro vehiculo a keda para cara pabao direccion e caminda pa drenta Bakval.

   Mesora a bati alarma, y tanto Polis como tambe Ambulans a acudi na e lugar.  E caminda a keda basta sushi di material di e SUV chines cu a spat tur caminda.

   Paramediconan cu a yega a check cu e chauffeur di e Brilliance V5 y el a djis haya algun golpi, pero no tabata necesario pa e bay Hospital.  Esnan den e Toyota Minivan no tabata herida.

   Awor e investigacion ta den man di Polis.