Varios instancia a uni pa rescata un turista cu a bira malo riba Hooiberg

ORANJESTAD (AAN): Diaranson mainta, autoridadnan local a ricibi informacion cu riba sero di Hooiberg tin un persona cu a bira malo.

  A haya sa cu ta trata aki di un turista Hulandes adulto mayor di 75 aña di edad.  E esfuerso di subi e sero, a pone bira basta malo.

   Aki ta unda cu instancianan a uni forza pa haci un bon trabao di rescate.  Den un forma tactico y bon coordina, hunto cu Team di Rescate forma pa Bombero y Ambulance, Polis a subi e top di Hooiberg pa atende e turista cu a bira malo. Riba e top di sero, primeramente ta personal di Ambulance a stabilisa e turista masculino pa asina prepar’e pa bah’e for di e sero.

   Despues di un rato trahando den equipo a logra baha e persona cu hopi cautela for di e sero pa despues e por a wordo transporta pa Servicio di Emergencia na Hospital pa mas tratamento medico avansa.

   Un tremendo trabao di e agentenan Policial, tambe Team di Rescate pa asina den un forma sigur a baha e persona for di sero di Hooiberg.

   Altocomisario sr Arnhem ta manda palabra di elogio na e Polisnan, y tambe na e team di rescate . Un tremendo trabao di tur e departamentonan.