Minister Rocco Tjon: --- * Esnan cu ta cumpli cu e rekisitonan por solicita te cu 10 di Februari
ORANJESTAD (AAN): Dialuna mainta, Minister di Husticia, Rocco Tjon, a tene un conferencia di prensa pa asina referi na un topico di importancia, specificamente e vacatura di Alto Comisario di Polis.
Minister Tjon a duna di conoce e motivo pakico a habri e vacatura pa e posicion di Alto Comisario di Polis. El a bisa cu Cuerpo Policial di Aruba ta den desaroyo cu diferente plan manera entre otro, e proyecto di ICT cu ta bay wordo implementa e aña aki.
Tambe tin proyectonan piloto manera e 'mobile app', pero tambe e 'mobile data terminals' cu ta bay wordo instala dentro di poco, a bisa.
Pa loke ta structura di opleiding, tin un comision ta trahando riba e transformacion di Scol di Polis den un Academia di Husticia.
E mandatario a laga sa cu tur e puntonan aki ta necesario pa por yega na un Alto Comisario cu ta bay wordo nombra pa un periodo di tres aña pa por duna contenido na entre otro, e proyectonan aki.
Den palabracionnan cu Hulanda pa loke ta e Landspakket, tambe tin diferente punto cu ta toca KPA, husticia y pesey ta asina importante pa nombra un persona, a remarca.
Aworaki a defini tur e puntonan strategico riba cual husticia lo bay traha den e proximo añanan. Pa e motibo aki, e vacature aki ta bay wordo habri.
Esnan cu ta cumpli cu e rekisitonan por solicita te cu 10 di Februari 2022. Tin un comision cu ta consisti di diferente director den husticia y di director di Departamento di Recursonan Humano cu lo haci e seleccion aki y a base di esey. E persona lo mester entre otro pasa varios screening manera: un 'veiligheidsonderzoek', 'geneeskundige onderzoek' y tambe un 'psychologische assesment' y ora di pasa esaki e persona lo wordo nombra pa un periodo di tres aña, e mandatario a remarca,.
