Habitante di Paraguana asina a perde su iPhone
ORANJESTAD (AAN): Esaki a yega di pasa na varios ocasion caba. No djis na Aruba, sino na otro paisnan. Bo ta ofrece producto pa bende riba Facebook, y ora di bay topa cu e cumprador, ata e persona ta rek careda y desaparece cu e aparato sin cu bo a haya placa.
Pesey varios pais awor ta creando un “Safe Meeting Location” dilanti Warda di Polis na diferente ciudad rond mundo. Pues dilanti Warda di Polis ta pone un zona unda bo por topa sea cumprador of bendedor, y asina na un forma safe boso ta ricibi of paga pa cierto producto. Kizas na Aruba tambe por bin cu un ‘Safe Meeting Location’ dilanti Wardanan di Polis.
Esaki DIARIO ta presenta, a base di loke a bolbe socede na Aruba. Tabata Diahuebs atardi banda di 4:45 pm cu a presenta na Warda di Polis na Shaba e ciudadano di inicial K.
El a bin denuncia cu un ‘transaccion di bendemento’ di un Smartphone a bay malo, y awor el a keda sin e aparato y no a haya placa tampoco.
E smartphone ta un Apple iPhone X cu ta pertenece na su yiu homber, y el a bay pa bendi esaki pa su yiu. Via Social Media a haya mensahe di un homber kende a mustra di ta hopi interesa pa cumpra e Smartphone aki.
Asina nan a palabra di antemano un lugar unda nan lo bay topa (‘meeting point’) na Paraguana. Esaki a socede pa 4:10 pm.
Diripiente e homber a yega den un Hyundai color preto. El a baha di e vehiculo y a cana direccion e ciudadano. Aki el puntra e ciudadano si e por mira e iPhone. Asina pues e ciudadano K. inocentemente a entrega esaki na e homber.
E homber desconoci tabatin zwembroek y un T-shirt blauw cla na curpa. El a bisa K. cu e ta bay djis un rato pa mustra e smartphone na su amigo den auto. E ciudadano K. a cana tras dje debi cu e no ta confia.
Diripiente e homber a rek un careda bay pa e Hyundai, y core drenta den e parti patras di e chauffeur. E ciudadano K. a mira cu e chauffeur tin un color di cuero cla, y un muts cora riba cabez. Tabatin 2 hoben mas den e auto.
Nan a rek careda bay cu e auto den direccion zuid pasando door di Paraguana.
Esaki ta di tantisimo vez cu algo asina ta socede na Aruba, y aparentemente ciudadanonan no ta realiza con peligroso e situacion aki ta. Varios biaha el a yega di socede banda di veld di Universal na Pos Chikito. Tambe a yega di socede na altura di Pos Abao. Awor ta na Paraguana.
E ciudadano K. a entrega keho di ladronicia na Polis.
E siguiente biaha? Por fabor palabra di antemano pa topa dilanti un di e tantisimo Warda di Polis na Aruba ora di bende bo smartphone.
