ORANJESTAD (AAN): Un adres cu supuestamente ta conoci rond como un "drive thru" pa cumpra substancia ilegal, a haya un 'bishita' di autoridadnan.
Seis persona, entre nan cinco homber y un hende muhe, a wordo deteni diabierna anochi, 9 di oktober 2026, durante un entrada hudicial cu Unit Narcotica a realisa na Fiyostraat, na Tarabana, den cuadro di un investigacion relaciona cu bendemento di droga for di un percela.
Durante e accion policial, e seis persona deteni ta J.D.Z.R. naci na Colombia di 49 aña, J.S.M.S na Colombia di 30 aña, K.A.D.Z.R naci na Aruba di 21 aña, G.Z.R naci na Aruba di 17 aña, Q.A.J.M naci na Aruba di 16 aña y e hende muhe di inicial A.J.C.T naci na Aruba di 41 aña.
Polis a confisca un cantidad considerable di marihuana.
Pa e operacion aki, diferente departamento di Cuerpo Policial di Aruba a duna sosten, incluyendo e unidad K-9, RRT y polis uniforma.
Unit Narcotica ta sigui intensifica su esfuersonan pa combati e bendemento ilegal di droga na Aruba.
Segun informacionnan, tres di esnan deteni ya sali den libertad, mientras e otro tresnan incluyendo, e dama a keda deteni.
Cuerpo Policial di Aruba ta haci un apelacion na comunidad pa coopera cu polis den e lucha contra actividadnan ilegal. Cualkier persona cu tin informacion of a observa algo sospechoso por yama e tiplijn di Polis na e number 11141. Polis ta enfatisa cu e persona cu suministra informacion por keda completamente anonimo.
