ORANJESTAD (AAN): Un biaha mas den fin di siman, autoridad a haya nan ta moviendo cu rapidez pa area Noordwest di Aruba pa un emergencia.
Tabata banda di 9:25 am, cu yamadanan a cuminsa drenta na Polis como tambe Centro di Alarma, cu un hende a caba di haya problema den lama y mester di yudansa urgente.
Mesora unidadnan di Polis di Strandpolitie como tambe Polis di Noord a ser manda. Centro di Alarma na su turno a manda Ambulans y tambe unidad di Bombero na e lugar por si acaso mester saca hende di lama.
E prome unidad di Polis cu a yega, a bin topa cu e situacion lamentabel. Un famia kende apenas algun dia prome a yega Aruba pa vacacion, tabata den panico e momento ey. Pasobra nan a yega beach di Arashi y a drenta den lama. E tata di famia a haye den problema pa motibo desconoci, kizas e no por landa.
Mirando cu e ta den urgencia y cu prome cu otro hende por haci algo, su propio yiu homber a acumula forsa y a gara e victima, y a lastre bay tera cune, unda asina a yuda pone riba beach. Algun hende eybanda a cuminza practica CPR riba dje, como cu e no tabata reacciona mas.
Ora cu Paramediconan di Ambulans a yega, nan a tuma over e proceso di CPR y tambe a pone ECG Monitor na su curpa pa observa curazon. Despues di a sigui cu e proceso di CPR pa varios rato, tin biaha asisti pa personal di Cuerpo di Bombero, tabata bisto cu ya tabata laat. A nota cu lamentablemente no por a haci nada mas pe.
Personal di Ambulans a pidi Centro di Alarma pa busca un Docter pa bin eynan. Pa Pa 10:42 am, Dr. Mungra a constata morto di e turista A.P. di 64 aña naci na Polonia. Polisnan a pidi presencia di Bureau Slachtofferhulp tambe, pa asina guia e famia cu keto bay tabata den shock na e momento dificil ey.
Shersh di Funeraria a yega pa asina hiba e restonan mortal. DIARIO y Cuerpo Policial ta manda palabra di condolencia na famia di e fayecido.
