Hoben menor di edad herida gravemente den bashamento di bala na Pos Chiquito

ORANJESTAD (AAN): Tur cos ta mustra cu un conflicto cu a presenta su mes Diasabra marduga den Betonicastraat na Pos Chiquito, diripiente a escala di tal forma cu tiramento a start.

   Esaki a socede net dilanti di Tio Pepe Bar & Restaurant cu e momento ey tabata cera.  E tiramento y buya aki a pone cu bisiñanan a core yama y bati alarma na Polis.

   Central di Polis a ricibi e prome yamada pa 2:58 am, y inmediatamente a manda unidad di Polis di San Nicolas pa bay check posible caso di tiramento den e area.  Diferente otro unidad di Polis a cuminsa move pa e lugar tambe.

   E prome unidad di Polis cu a yega eynan, a bin haya e area full bashi y abandona.  E oficialnan a topa cu ningun persona.  Nan a saca nan flashlight y a cuminsa check si acaso por haya huls benta abao.  Personal di Ambulans tambe a yega, pero no por a haci nada como cu tin nada di victima.

   Cu nan flashlight y listrando meticulosamente, e agentenan rapidamente a bin haya varios huls abao riba Betonicastraat.  Mesora Polisnan a saca varios cono di plastico pa pone riba nan, pa proteha nan te ora cu team forensico di BFTO yega pa documenta tur cos.  Nan a check tambe den Malohistraat pa mira si por tin huls benta abao.

   Recherche di San Nicolas tambe a yega pa cuminsa investiga.  Net dilanti di Tio Pepe Bar & Restaurant a bin haya un auto compacto Mini Cooper color cora cu dak blanco, cu ta destrui.  Aki tambe a seya e area di e auto pa asina por haci investigacion.

    Victima a yega Hospital: Un rato despues, Servicio di Emergencia di Dr. Horacio Oduber Hospital a notifica Central di Polis, cu personal medico e momento ey ta atende un hoben kende a wordo treci eynan, cu un herida di tiro na su curpa.

   Mesora Docternan a cuminsa atende, y a core pone Specialista na turno na altura pa e acudi pa asina trata na interveni pa stop sangramento interno.

   Vocero di Polis a splica cu ta trata aki di e victima di inicial fam M., y e ta un menor di 17 aña. E situacion di e victima ta critico. E caso na e momento aki ta bao investigacion.

   Cuerpo Policial ta haci un suplica pa es cu sa algo of a wak algo pa yama e tiplijn di polis cu ta 111-41. Cora cu bo ta keda anonimo.