Peligro den area di Cumana pa Sero Patrishi
*Polis a gara e delincuentenan mesora
ORANJESTAD (AAN): Tabata Diasabra anochi banda di 7:40 pm, cu Central di Polis a ricibi yamada cu un asalto a caba di socede riba un jogger cu ta cana riba e walkway pa peaton cu tin a lo largo di WVB Boulevard. Mesora a cuminza manda unidad di Polis di Playa rumbo di Paperclip Rotonde na Sero Patrishi.
E informe ta cu un homber cu ta cana y core pa salud y condicion, a wordo asalta door di dos hoben. Central a cuminsa duna informe mesora cu e dos hobennan aki ta bisti cu jacketnan preto, cu capuchon, ambos ta bisti cu carson largo. Uno di nan tin un cuchiu, y e otro a usa cadena di bicicleta durante nan asalto y menasa.
Poco rato despues, Central di Polis a avisa unidadnan cu e victima a cana te yega na e parkinglot di e recien inaugura edificio di gym Cuts & Curves na Sero Patrishi, y e ta warda Polisnan riba e parkinglot.
Unidad di Playa a cuminsa mobilisa rumbo pa e gym na Sero Patrishi, pero ora cu nan a yega banda di e Paperclip Rotonde, e agentenan atento a mira dos hoben eybanda cu ta cuadra cu e descripcion duna. Polis mesora a baha di nan vehiculo y a bay riba e dos hobennan aki. Nan a wordo ordena pa stop di cana. A yega cerca y a pidi e hobennan permiso pa controla nan tas colga na schouder. E dos hobennan a bay di acuerdo.
Ora cu Polis a habri e tas di e sospechoso di inicial M., el a bin haya cadena di bicicleta aden. Un otro unidad di Polis a yega cerca pa sosten e momento ey. Central di Polis e ora a avisa e unidadnan, cu e victima a sali bek for di Cuts & Curves y ta canando den nan direccion.
Na momento cu e victima ta yegando cerca, mesora el a confirma na Polis na forma spontaneo cu e dos hobennan ey a comete atraco riba dje. E victima di inicial S. a bisa cu e tabata na pia cruzando caya bao di e viaducto na Meiveld patras di ex-Codemsa rumbo pa Sero Patrihi. Dado momento el a mira e dos hobennan aki na preto ta cana den su direccion. El a bisa cu e hoben cu cabey krul, a saca un cuchiu y a dirigi esaki den su cara. Den e otro man, e mesun hoben tabatin cadena di bicicleta.
E victima a bisa cu e hoben cu cabey krul a exigi di dje 100 Florin of entrega su smartphone. Y aki e dos hobennan a trata di ranca cu forsa su tas y su smartphone di dje, pero nan no a logra, como cu e victima a cuminsa rek den direccion contrario.
Despues cu e victima S. a keda wanta su tas bon, el a logra di core bay mas leu cu e hobennan y a sigui core bay. El a sigui core direccion Sero Patrishi, y segun su bista el a mira cu e hobennan a core bay zuid direccion Tarabana y Dakota.
Relaciona cu tur esaki, Polisnan a detene tanto e hoben di inicial M. y tambe di inicial L. pa 8:10 pm. Cu vehiculo di transporte nan a ser hiba pa Warda di Polis. Aki Fiscal Auxiliar a atende e hoben L., kende a duna ordo pa encarcela e hoben aki na Warda di Polis na San Nicolas, y tin di bay cu tur articulo confisca pa interogacion y investigacion door di Jeugd en Zedenpolitie.
Fiscal Auxiliar a dicidi cu e hoben M. ta wordo hiba pa Warda di Polis na Santa Cruz pa wordo encarcela cu demas prueba, pa asina e wordo interoga y investiga door di Jeugd en Zedenpolitie.
Material cu Polis a confisca tabata un cuchiu, cadena di bicicleta, un jacket preto cu capuchon. Den e Tasnan di e sospechosonan a haya varios cigaria di marihuana, un sakito transparente di plastico conteniendo puiro di cociana, varios sakito bashi, y tambe a haya atributo manera grinder di marihuana, lighter, y mas. Tur esaki a wordo pasa pa Unidad Anti-Droga di Polis.
