Hendenan a yuda e victima yega bek tera
ORANJESTAD (AAN): Tabata Diamars mainta pa 11:10 am, cu Central di Polis a wordo notifica door di Centro di Alarma 911, cu un persona masculino a haya problema den lama na Mangel Halto y e no ta reaccionando. Ya caba unidad di Ambulance ta rumbo pa e lugar.
Central di Polis na su turno tambe a despacha patruya di San Nicolas pa e lugar di sucedido. Na yegada di e patruya, e agentenan a compronde cu un pareha Mericano tabata snorkel y na dado momento e señora a ripara cu su casa no ta reaccionando.
Di biaha el a cuminza grita pa auxilio, y a bati alarma. E gritamento a hala atencion di algun persona cu ta nabegando riba kayak den cercania, y nan a core yega cerca, y a yuda pa trece e persona na canto. Na canto a cuminsa practica CPR riba e victima.
Ora cu Ambulance a presenta, Paramediconan a traha rapido pa tuma over e trabao di CPR, y a pone aparato di curason na e curpa pa mira si tin reaccion. Nan a haci nan maximo esfuerso pero lamentablemente no por a haci nada mas pa e turista.
A pidi pa Polis manda un Docter. Algun rato despues, Dokter Voskuil a constata morto di e turista masculino di nacionalidad Mericano di 56 aña di edad.
Bureau Slachtofferhulp a presenta tambe na e lugar pa asina yuda y guia a famia den e momento dificil ey. Cuerpo Policial Aruba ta extende su mas profundo condolencia na famia di e fayecido den e momentonan dificil aki.
