ORANJESTAD (AAN): Informacion nobo a drenta relaciona cu e informe cu DIARIO a publica den corant di Diahuebs caba.
Ta trata di detencion estilo accion rapido ehecuta dilanti un Supermarket. E caso aki tin di haber cu un caso grandi di droga, cu autoridadnan local ta investigando.
Manera ta conoci, tabata Diaranson atardi pa 2:00 pm, cu clientenan cu tabata haciendo compras na un Supermarket riba e caminda di Hooiberg pa Santa Martha, na altura di Sero Biento, diripiente a mira monton di Polis, cu yudansa di e.o. Arrestatie Team a yega pafo, cu nan cara tapa.
A resulta cu despues cu Ministerio Publico a duna luz berde, nan a subi caya siguiendo e sospechoso, y ora cu a nota cu e ta bayendo Supermarket, e mensahe a ser duna pa ehecuta e detencion eynan.
Nan a baha cu arma den man, y a bay mesora na un auto compacto Kia Picanto color blauw-cla cu number A-56681 cu a caba di yega e Supermarket. E auto tin tinted windows, y e chauffeur ainda tabata sinta den e auto compacto. Pa por tin control riba dje, y evita cu e ta start auto y reverse, posiblemente pesey Polis a yega y kibra su bentana, pa asina wanta e homber J.d.l.C. di 37 aña. Pasobra e riesgo ta cu e homber tambe ta arma.
El a worde hiba mesora pa oficialnan hudicial pa interogacion cuminsa. Su detencion tin di haber cu importacion, y tambe exportacion di droga. Droga cu ta drenta e isla via lama.
No ta descarta cu mas detencion lo sigui pa e caso grandi aki di droga.
