Tuma accion no ta suficiente y mester busca un solucion y mester placa pa yuda Adictonan Ambulante

Vocero di Polis ta haya problemanan aki serio

• Polis, Hunto, etc., ta haci nan best 

ORANJESTAD (AAN) E Relacionista Publico di Cuerpo Policial, señora Liliana Rasmijn, den entrevista cu DIARIO a indica cu, manera a conoci, reunionnan a cuminza tuma lugar desde basta tempo caba, unda cu Polisnan di Bario, hunto cu Stichting Hunto y DCI, ta concern cu e problema di adictonan ambulante, ta haci nan best y kier yega na un solucion, pero mester di fondo pa logra esaki.

   Rasmijn a bisa cu esaki ta un problema hopi grandi pa nos comunidad, pa Caya Grandi y nos turismo. Awo nan ta tuma accion, pero mester bin cu solucion pasobra mañan ta hala e problema di un caminda pa otro pero no ta buscando e solucion.

   “Polis ta haci di su banda, pero no ta polis pero no ta polis mester haci’e. Manera nan ta bin awe hunto, nos mester di mas stakeholders, pasobra e personanan aki nos ta papia di hende. Personanan cu mester haya yudanza, cu manera nos por a wak ora nos a bay Stichting Hunto, unda nos a haya full un splicacion amplio, y mira e proceduranan, pero un caminda e ta keda falta algo”, Liliana Rasmijn a señala.

   El a sigui splica cu nan a cuminza na Plaza; e personanan aki ta bay boluntariamente, no tin ley cu ta mara nan cu ta obliga nan. “Ora nan haci un delito, nos ta bay cu nan, pero atrobe nan ta afo. Esey mes ta e problema di e pueblo, si Stichting Hunto y otro instancianan ta purba di haci algo, ta yega un momento cu nos ta purba convence nan pa nan por haya un tratamento. Pero cual momento cu ta, nan por bisa ‘no mi kier stop’ y nan ta bolbe bin bek den sociedad. Esey ta nos problema, nos mester traha hunto no awe sino e dianan cu ta bin, nos tin cu keda busca e solucion. E hendenan aki mester di un lugar pa biba y nos tin un programa extensivo pa esaki. Nos ta compronde cu e ta un molester pasobra ora ta yega e momento, pa un florin of dos florin, nan ta kibra un bentana cu ta costa bo miles di florin”, Liliana Rasmijn a señala.

   El a subraya cu KPA y tur instancia ta haci nan best, pero nan mester di placa pa yuda e personanan aki.