Mester tin cuidao pasobra tin di nan ta agresivo
ORANJESTAD (AAN) Nathy Ventura, di Centro di Control di Cacho, a splica den un entrevista cu Matutino DIARIO, cu tur cacho cu ta wordo recogi riba caya door di KPA di Polis, ta wordo hiba na e Centro aki.
“E ta nos trabao e ora ey pa wak e situacion di e cacho, evalua si nan ta hopi agresivo y tin cu wordo poni drumi, y tin ora basa riba e situacion si e cacho tin doño y esaki riba su mes por tuma e decision di pone e cacho drumi”, Ventura a menciona.
Tambe tin situacion unda un hende tin un cacho brabo na cas, y pa un descuido el a sali, e doño tin derecho di hay’e bek, bao e condicion cu e ta pidi un vergunning pa tin e cacho aki.
Nathy Ventura a splica cada situacion di cacho ta diferente. Tin incidentenan cu ta sosode door di un descuido, pero na final di dia nan ta bestia cu con cu bay bin, ta haya nan caminda di sali. “Si bo ta un doño responsabel, bo ta haya e caminda corecto pa bo haya bo mascota bek. Pero bo mester ta extra cuidadoso pa cuida e cacho”, el a comenta.
Manera ta conoci tin ley di cacho, y Polis di Bario ta atende cu esaki, y e centro di control di cacho ta traha direct cu polis, den e sentido aki, pero esaki ta un peso fuerte riba nan pa atende tur caso. “Pesey, Centro di Control di Cacho ta cooperando cu esaki, nos ta bay hunto cu nan, nos ta pidi tambe cooperacion di fundacionnan; manera Luna Foundation, Crijojo Trappers, AWAA, entre otro, cu hunto cu KPA nos ta forma un teamwork”, el a splica.
