Tres tripulante deteni riba lama a confesa cu parti di droga tabata destina pa Aruba

Cargamento intercepta como 195 km pabao di e isla

• Armada Colombiano a intercepta e GoFast aki
• Huez Colombiano a manda tur tres pa prison 

ORANJESTAD (AAN): Siman pasa ya caba den forma exclusivo, DIARIO a raporta di e accion riba Lama Caribe, den zona hancho pabao di Aruba unda autoridadnan di Colombia y Merca hunto a dal un golpi fuerte na e structura di contrabando di narcotraficantenan cu ta exporta droga fuerte for di Colombia.  Un avion di vigilancia di Merca, a detecta un speedboat tipo GoFast cu a sali di Colombia y tabata dirigiendo su mes rumbo pa Caribe.

   Mesora nan a informa Armada Colombiano cu a cuminza mobiliza den e area pa asina intercepta e boto aki cu tabata moviendo cu velocidad halto.

   Armada di Colombia, hunto cu Forza Aereo y e Joint Interagency Task Force South (JIATF South) di Merca, a detecta e boto aki moviendo na como 195 km Noord-noordwest di Arashi (Aruba).  Esaki ta igual cu 110 km panort di Punta Gallinas na departamento di La Guajira na Colombia.

   Guardacosta Colombiano cu sede na Cartagena tambe a drenta den accion, y nan a pone algun speedboat di rapid response riba awa, y nan a move rapidamente riba e GoFast aki.

   Ora e GoFast a detecta cu autoridad ta yegando cerca, nan a purba di huy y no kier a stop.  Asina forzosamente e autoridadnan Colombiano a pone cu e GoFast a stop, y e tripulantenan mester a hisa na mannan.

   Oficialnan Colombiano a aresta e tres miembro di tripulacion, y hisa nan abordo di nan patruyeronan.  Y a mara un cabuya na e GoFast y a lastre rumbo pa un Pier na Cartagena, cu e meta pa bay revisa esaki completo.  Abordo a bin haya 40 bulto grandi.  Den nan a bin haya un total exacto di 1.000 paki rectangular.  Tambe a haya monton di bari di plastico yena cu combustible.

   Na Cartagena a haci test riba e contenido di e droga, y esaki a reacciona positivo riba cocaina.  Ora di a pisa esaki, el a duna un peso di 1.006 kilo.   Fuera di e cargamento grandi di cocaina aki, a haya un baki tambe yena cu marihuana comprimi.  Esaki a yega na un peso di 1,9 kilo di marihuana.

   Tripulantenan a basha abao: Awor a sali na cla, cu e tres miembronan di tripulacion riba e GoFast aki ta Dominicano.  Y durante interogacion na Colombia, nan a bin basha abao cu nan tabata rumbo pa Aruba pa “drop” algun bulto di cocaina, y despues bira direccion Republica Dominicana pa hiba e restonan.

   E droga cu nan ta manda Aruba, ta pa yuda esaki wordo transporta di un forma of otro (sea avion of carga) pa Europa.  Anto e droga pa Republica Dominicana, ta destina pa bula e trampolin pa yega Puerto Rico y asina drenta Merca facilmente.

   Esey ta loke Ministerio Publico a declara Diasabra na Cartagena!  Nan a ricibi un monton di informacion valioso di e tres personanan aki, y nan lo ta pasando e detayenan aki pa oficialnan di Aruba y tambe di Republica Dominicana.

   Nan a indica cu un Huez Colombiano a dicta sentencia di prison pa e tres Dominicanonan aki.  Nan a wordo identifica como Antonio Almonte Garcia, Juan Ari de la Cruz Tabares, y Victor Jose Reyes Nuñez.