Diamars pa Diaranzon marduga
ORANJESTAD (AAN): Tabata Diamars anochi laat pa 11:50 pm, net ora cu un unidad di Polis di San Nicolas ta pasando den centro di ciudad, nan a mira un auto blauw ta coriendo riba Zeppenfeldtstraat na altura di Roxy Bar.
E chauffeur tabata coriendo direccion pariba cu su bentananan baha. Polis tabata moviendo poco despues tras di e auto. For di nan unidad, a mira claramente cu e chauffeur ta papiando y uzando su smartphone, pues e tine den su man. E chauffeur di e auto blauw a core poco-poco, y a bira na man robez pa subi Lagoweg sin pone signal-light.
Despues e chauffeur di A-47257 a bolbe bira na man robez den Rembrandtstraat sin pone luz di señal atrobe. Ta comosifuera e chauffeur aki nunca a siña pakico e luznan ey ta wordo instala den su auto na fabrica.
Polis e ora den Rembrandtstraat a dune un señal pa stop, y el a cumpli cu esey tambe.
Agentenan a baha y pidi su rijbewijs, y a duna un splicacion tambe pakico nan a stop e di sigui core.
Ata e homber tras di stuur no tabatin rijbewijs cune. Pero el a mustra nan un potret riba su smartphone di su rijbewijs. Polis despues a pidi pa mira e documentonan di e auto. Esaki e persona no por a mustra.
E agente a laga controla e Plachi di Number via Central di Polis usando computer di DIMP. E control a trece como resultado, cu e Plachi di Number ey ta registra riba otro vehiculo.
Polis a duna e persona aki di inicial M.V. diferente multa. E prome ta un boet cu e no a haci uso di su luz di señal (boet di 200 Florin) ora di cambia direccion. Tambe a dune un boet pasobra a gare cu smartphone den su man mientras e ta manehando un auto (boet di 500 Florin), tambe ta core auto sin cu tin impuesto paga (boet di 350 Florin), y core sin cu tin Keuringskaart (boet di 200 Florin).
Pues e compay aki lo tin di bay paga 1.250 Florin na boet total.
Pa colmo, Polis a confisca e auto y a manda busca Takelwagen pa hibe Warda di polis. Pues pa e haya su auto bek, den futuro e lo tin di bay paga e gasto di Takelwagen tambe, y esey a socede ya den oranan di marduga. Takelwagen e ora ta cobra un fee extra pa colmo.
