- Cocaina den forma di paki y tambe cilindrico
- Detene dos hende homber y un muher
ORANJESTAD (AAN): Siman aki tabata uno basta activo pa autoridadnan hudicial, incluyendo personal di Unit Narcotica di Cuerpo Policial di Aruba.
A base di investigacion y tip ricibi, a bin descubri un cantidad grandi di cocaina scondi den Container. No obstante cu a trata na sconde e droga, toch autoridadnan local a logra haya nan. E biaha aki a nota cu algun di e pakinan ta normal den estilo vierhoek cu semper sa haya cocaina aden. Pero e biaha aki a haya cocaina lora tambe den estilo tiki cilindrico. Esaki posibelmente a wordo haci pa nan por wordo mihor scondi.
Unit Narcotica a cuminsa haci investigacion di e droga aki, y a base di esey cu permiso di Ministerio Publico, a drenta den accion y a detene 3 persona localmente.
Vocero di Polis a confirma esaki, y a indica cu esnan deteni ta e homber G.JM.I. naci na Aruba, e muher G.M.M.I. naci na Aruba, y e homber J.M.I. naci na Colombia.
Aunke vocero no a declara esey, por asumi cu ya caba e droga cu a wordo confisca a wordo destrui. Atrobe ta lamentabel cu Polis no ta menciona e kilo di e droga cu a wordo haya.
Hecho si ta cu Unit Narcotica ta keda traha incansabelmente pa keda combati e parti di droga.
Cuerpo Policial ta keda haci suplica na comunidad cu sa algo of wak algo yama e tipline di polis cu ta 111-41. Nan ta garantiza cu bo lo keda anonimo.
