Un Dialuna hopi activo pa Wardacosta y Polis
*Riba Speedboat a detene 5 venezolano
*Den razzia na Madiki a detene 5 hende mas
ORANJESTAD (AAN): E accion riba lama unda Wardacosta a persigui un Speedboat pazuid di Aruba, a hala hopi atencion. Specialmente e hecho cu e Speedboat dado momento a bolter.
Oficialnan di Wardacosta riba nan boto Metal Shark, e ora a cambia di tarea esta di purba di rescata tur 5 persona cu tabata abordo di e boto. Fuera di e cinco Venezolanonan aki, a logra di pisca y recoge varios bulto cu droga for di riba lama.
E accion riba lama aki a sigui ora cu a trese tur cinco Venezolano y e cargamento di droga bek pa Pier di Savaneta. Esnan deteni a wordo pasa pa Cuerpo Policial di Aruba, cu mesora a cuminsa traha riba esaki.
A bin haya sa, cu e Speedboat aki tabata prepara pa haci un ‘dropping’ na Aruba, y seccion di Departamento di Crimen Organisa a haya impulso pa investiga, y a logra haya datonan valioso cu mesora a consulta cu Ministerio Publico, pa asina haci un razzia.
Mientras cu ainda solo no a sali, oficialnan hudicial di Crimen Organisa cu respaldo di diferente unidad a tene un razzia inespera na un cas na Madiki. Tur esaki debi na accion riba lama un rato prome unda Speedboat a bolter.
Den e razzia na e cas na Madiki, oficialnan a detene 5 persona, di cual 4 ta homber, y uno ta un muher di nacionalidad venezolano. Pa awor nan ta keda deteni, debi cu nan lo tin di duna cuenta na husticia pa cu nan envolvimento den e caso grandi aki.
Durante e razzia na Madiki, diferente departamento di Cuerpo Policial a forma parti, entre otro Team di Aresto, Flex Team, K-9 Unit y polis Uniforma. Un bon trabao di Wardacosta di Caribe Hulandes, e personalnan riba dos Metal Shark, conhuntamente cu Cuerpo Policial Aruba.
No ta descarta cu lo tin mas detencion. Di parti di Cuerpo Policial un biaha mas ta recorda e cuidadanonan cu si tin cualkier informacion pa yama e tip-line di polis cu ta 111-41. Corda cu nan ta garantisa bo anonimidad.
DIARIO a indica cu Wardacosta a splica cu e droga confisca riba lama ya caba a wordo destrui, pero no a menciona e peso. Vocero di Polis na su turno a splica cu e narcotica confisca den su palabranan ta “bastante droga”.
