Toyota Rav4 a bolter na Sabana Berde; chauffeur a sali ileso

ORANJESTAD (AAN): Diasabra marduga un accidente di trafico a sosode na altura di e aeropuerto, unda un auto a bolter for di caminda.

Polis a haya informacion di e incidente y a bay mesora pa e sitio. Na yegada, nan a topa un Toyota Rav4 cu bolter riba su dak, pabou di e rotonde na Sabana Berde.

Segun informacion recopila na e sitio, e chauffeur a logra sali for di e vehiculo sin haya ningun herida. Ambulance tambe a presenta pa evalua su condicion, pero despues di un combersacion cu e personal medico, e chauffeur a indica cu e tabata sinti su mes bon y no a considera necesario pa bay Hospital pa un control medico.

Pa por move e auto for di e sitio, tabata necesario pa un takelwagen presenta y lanta e Toyota Rav4, cu posteriormente a wordo hiba.

Polis a registra e incidente y a sigui cu e investigacion tocante e causa exacto di e boltermento.