ORANJESTAD (AAN): Polis a detene un agente policial ayera riba sospecho di trafico ilegal di hende of mensensmokkel. Su esposa tambe a keda deteni.
Ambos a wordo presenta diabierna atardi dilanti hues-comisario y nan detencion a keda alarga.
E acusacion contra e dos sospechosonan aki ta encera cu nan a duna hendenan entrada na Aruba, mientras nan tabata sa cu esey ta contra ley. Tambe nan a duna acomodacion na e mesun personanan aki y na otronan sin estadia legal na Aruba. Ademas nan ta wordo sospecha di falsificacion y di a pone e personanan aki traha ilegalmente.
Den boca di pueblo e terminonan trafico ilegal di hende (mensensmokkel) y trata di hende (mensenhandel) ta wordo bruha hopi biaha. Sinembargo, ta trata di dos hecho castigabel totalmente diferente.
Mensenhandel
Ora di trata di hende of mensenhandel ta referi na exploitacion di personanan. Esaki por tuma diferente forma.
Exploitacion laboral ta (por ehempel) ora un persona tin cu traha bao di condicionnan malo, cu un sueldo hopi abao, sin dia liber of sin e posibilidad pa bay di trabao. Exploitacion sexual ta ora un persona wordo obliga pa haci actonan sexual sin cu nan mes kier. Exploitacion criminal ta ora un persona ta wordo obliga pa comete crimennan, manera transporta droga.
Mensensmokkel
Den e investigacion aki ta trata di trafico di hende of mensensmokkel.
E delito aki ta referi na crusa frontera di un pais na un manera ilegal. Hasta si e persona doño di curpa cu ta wordo trafica mes kier bin Aruba (por ehempel dor di drenta como turista y keda pa traha), e ta contra ley. Practicanan asina ta debilita maneho di Pais Aruba y ta trece riesgo y gasto pa henter comunidad.
Ademas sospechosonan di e tipo di crimen aki, ta gana gran cantidad di placa na un manera ilegal, mientras cu otro ciudadanonan mester traha duro y largo pa gana nan bida. Esaki ta duna e sospechosonan un ventaha deshonesto riba otro personanan (y nan negoshinan) cu si ta cumpli cu regla y ley.
Pa colmo, e personanan envolvi tabata hopi dependiente di e sospechosonan. Nan tabata traha pa nan y ta biba cerca nan. Nan mester a obedece, sino nan lo perde nan lugar di biba y nan entrada. Nan no tabata ni segura. Esey kier meen cu si algo a pasa nan, tur gasto lo a cay pa comunidad carga.
Cu un agente policial, kende precisamente mester mantene ley, ta envolvi den e tipo di hecho asina, ta haci e cos mucho mas serio.
Segun Ministerio Publico, e investigacion den e caso ta andando y nan lo duna mas informacion na momento cu desaroyo di e investigacion ta permiti.
