Tiramento a finaliza cu morto den Hot Zone na Palm Beach

Juni Carty di 31 aña a perde su bida

• Esaki a bira e di tres asesinato pa 2022
• Sospechoso principal a keda deteni despues 

ORANJESTAD (AAN): Tabatin basta movimento e momento ey.  Sonido di musica tabata plama den henter e area di Palm Beach, y turista- cu hendenan local tabata cruza di un banda pa e otro pa bishita diferente lugar nocturno.

   Diripiente un pelea a start net pafo di e club nocturno BARU Lounge, cu ta situa riba propiedad di Brickel Bay Resort y cu antes tabata conoci como Sand Bar y tambe como Sand Aruba.  Desde April 2022 el a cambia di nomber y a bira BARU Lounge.

  Publico presente mesora a ripara algo ta pasando cu e pustamento di boca aki, cu den un fraccion a escala.  Diripiente nan a mira con un hoben a saca arma y a djis los tiro riba e victima cu a bay pa cruza caya pa asina bay banda pazuid unda tin South Beach Center.  Mientras cu tin auto ta moviendo, el a los tiro riba e victima, kende door di impacto di bala a sali cay ey mes, na e zebrapad, como 5½ meter leu for di entrada di e restaurant Brutto Aruba.  E agresor despues di esey a huy.

   Pa 1:25 am e prome yamada a drenta na Central di Polis di e pelea cu a finaliza den tiramento dilanti BARU Lounge na Palm Beach.  Inmediatamente diferente unidad di Polis di Noord a mobiliza pa e area, y e prome unidad a bin haya un homber benta barica abao riba e caminda net riba e zebrapad.

   A core pidi presencia di Ambulans pa bin duna un man, pero ora cu Polis a baha pa bay check, a cuminza nota cu e victima masculino aki casi no tin señal vital mas.  Na mesun momento Polis a nota cu tin un multitud eybanda, cu algun hende basta hostina cu loke a socede.  Pa tal motibo, a pidi pa mas patruya di Polis bin duna un man.

   Monton di Polis pa e lugar: E peticion pa mas refuerzo, a pone cu Polisnan di Oranjestad, Santa Cruz, San Nicolas, y Team di Aresto tambe a mobiliza pa bay yuda tene control, y preserva tur prueba.  Personal Forensico di BFTO tambe a mobiliza pa e area.

   Hendenan a nota cu tabatin hopi turista den e area, y nan a keda den shock pa mira e persona benta eybao.  Ambulans a yega y rapidamente paramediconan a opta pa hibe rumbo pa Hospital.

   Sinembargo na yegada, ya caba no por a haci mucho mas.  E victima a yega ta ‘flat-line’, y pesey pa 1:36 am, Docter a constata morto di Anthony Alexander Carty, naci dia 14 di Augustus 1991, pues tin 31 aña di edad.  E ta conoci pa su amigonan como ‘Juni’, y ta biba na Pos Chikito.  El a fayece di e impacto di bala, y e tabata sangra profusamente di e heridanan ricibi.  E caminda a keda cu hopi mancha di sanger.  Fuentenan Policial a indica cu e victima den pasado na numeroso ocasion a haye envolvi cu husticia y a yega di keda encarcela.

   Hendenan furioso pafo di Hospital: Despues Polis mester a wordo manda tambe pa Servicio di Emergencia na Hospital, como cu amigo- y famianan a yega eynan y no por a acepta cu nan ser keri a fayece.

   Polisnan a bay eynan pa asina calma nan un poco, y aki a ricibi asistencia di Bureau Slachtofferhulp tambe.  E tabata algo duro pa famianan cu e morto tragico di nan ser keri.

   Mientras tanto e oficialnan di Polis dilanti BARU Lounge y tambe Brutto Aruba, a keda papia cu testigonan pa asina haya mas informacion posible di loke a socede.  Mirando cu e area aki tin hopi Security Video Camera, tur esaki a yuda pa acumula mas informacion.  Tur detaye a ser duna na oficialnan di Recherche di Noord cu a cuminza haya un mihor bista di loke a socede, combina cu e detaye ta kende e persona cu a tira ta.

   A cuminza busca sospechoso: Unavez cu Recherche a haya detaye valioso di e nomber di e agresor y e auto cu e ta coriendo aden, nan a dicidi pa activamente busca forma pa detene.  Como cu tin di actua rapido pa stop cualkier otro atake cu e por ocasiona, y mirando e hecho cu e ta ‘vuurwapen gevaarlijk’, a dicidi na pidi sosten di Team di Aresto.

   Asina diferente unidad di Polis a cuminza core den area di Sero Janchi, Moko, Saliña, Catiri, y Kudawecha pa check si por topa cu su auto compacto, esta un Toyota Vitz.  Despues hunto a bay rumbo pa un Apartamento na Saliña, cu ta su adres.

   Ora nan a yega, e agresor a ripara cu Polis ta pafo, y el a busca forma pa huy.  Polisnan di Team di Aresto a bay su tras y a demostra cu nan tin mihor condicion fisico cune, y facilmente a gare.  Na e adres ey a topa cu e Toyota Vitz tambe.  Polisnan a pone paña riba su cabez pa e no mira kende ta e oficialnan cu a detene, y mesora a busca un vehiculo special pa transporte pa Warda di Polis na Noord, unda Fiscal Auxiliar mesora a duna ordo pa e keda encarcela.  Tin indicacion cu e hoben deteni aki ta un menor di edad.

   Na Saliña, e auto Toyota Vitz a wordo confisca y hiba pa Warda di Polis pa asina haci investigacion riba dje.  Autoridad ta convenci cu esaki ta e auto cu el a usa pa huy for di area di BARU Lounge.

   Esnan cu tabata hunto cu e agresor lo por spera yegada di Recherche tambe un rato pa otro, como cu nan lo por tin algo di haber cu e caso aki tambe.  Pues no ta descarta mas detencion.

   Asina hopi arma riba caya: E caso aki a bolbe pone spotlight cu tin demasiado arma di candela den circulacion riba e isla.  Pasobra na Aruba no tin ningun tienda of negoshi unda bo por yega y cumpra un arma di candela.  Pues ta den forma ilegal mayoria di e armanan aki ta drenta Aruba, y den cierto forma ta yega den man di personanan cu tin mentalidad cu no ta razona hopi y ta bira hendenan ‘trigger-happy’ cla pa los bala pa cualkier conflicto.

   Ta parce cu esnan cu arma di candela ta kere cu ta wega nan ta hungando.  Pero aki bo ta “play stupid games, win stupid prizes”.  Su premio ta detencion y encarcelamento den cel di Polis.

   Aunke Ministerio Publico a anuncia un campaña pasivo pa hendenan boluntariamente entrega arma bek den bakinan special cu nan a pone na diferente lugar, toch publico a cuminza expresa cu nan ta prefera mihor un accion mas pro-activo.  Mas control inespera den Hot Zone, den area di Linear Park, unda hunto cu Ministerio Publico ta duna OK pa tene listramento preventivo.  E speranza ta cu Ministerio Publico lo cuminza haci esaki bek, pasobra ta inaceptable cu den un zona turistico un crimen di impacto asina fuerte ta keda registra durante un fin di siman.

   Vocero di Polis, Lito Lacle a confirma cu e asesinato di Anthony Alexander Carty a bira e di tres pa 2022.  El a bisa cu Recherche di Noord ta sigui cu e investigacion.

   Na famianan di e fayecido, DIARIO y Cuerpo Policial ta extende su mas profundo palabra di condolencia.