ORANJESTAD (AAN): Diadomingo marduga banda di 3:45 am, alarma a ser bati cu atraco a ser cometi riba caminda di Tanki Flip pa Tanki Leendert, unda na altura di Pencro Telecom tin un trailer di Gio JJ Burger cu anochi ta bende cuminda.
Polis a yega den un rato eynan, y a bin topa cu e bendedor G. ainda spanta. Segun G. a splica Polis, cu banda di 3:30 am e tabata den e trailer cerca di su cash register, ora cu un homber desconoci cu color di cuero bruin cla, cu un poloshirt preto y jeans, a para na e porta di su trailer. Aki el a djis hisa su poloshirt un tiki na halto, pa revela cu e tin un arma di candela eynan poni na su jeans.
Na mesun momento na e bentana di bende cuminda, parti pariba tabatin un otro homber di color di cuero bruin cla cu un shirt blanco bisti.
E bendedor G. e momento ey tabatin su cash register habri, y esaki a pone bay den un sorto di panico. E ora el a gara tur placa di e caha, y a entrega tur esaki na e homber cu shirt blanco cu tabata para na e bentana.
Despues di esey, tur dos homber a rek careda bay direccion pariba pa un auto color scur cu tabata staciona na un cas mas pariba. Aki e bendedor G. a mira con e hombernan aki a drenta den e auto y a core bay direccion pariba.
Segun e bendedor G., e tabatin como 1.200 Florin den cu cash register.
Polisnan a pone personal di T.P.B. na altura, y nan a yega eynan pa asina sigui cu e investigacion di atraco aki. Cualkier persona cu por a mira algo socede, por yama Tipline di Polis na 111-41 pa yuda soluciona e caso aki.
