Lito Lacle, Presidente di SPA:
ORANJESTAD (AAN)-- Presidente di Sindicato di Polis Arubano (SPA), señor Lito Lacle, a duna di conoce den entrevista cu DIARIO, cu e tin algun punto di dialogo cu Gobierno caba, cu podise tin cu trata hunto cu Sindicatonan Uni, of cu SPA so.
“Pero mi ta kere cu HOFA nos tin cu trate hunto, Kinder Toelage tambe, pero e problemanan social tambe nos tin cu hacie hunto, pasobra no ta touch solamente Cuerpo Policial y Husticia, pero un bez cu e ta yega den man Husticia caba, ya nos sa cu e partinan prome di un manera of otro a faya, of no a dedica suficiente na preveni esakinan di pasa”, Presidente di SPA a señala.
Señor Lito Lacle a indica cu esakinan ta problemanan cu Aruba mester trata conhuntamente cu instancianan, of stakeholders mester hacie hunto pa purba yega na solucionnan of acuerdonan.
“Loke nos como Arubiano no ta bon den dje ta pa yega na acuerdonan firma. Una bez cu acuerdonan no ta firma tur hende por bay tur banda. Aworaki, un di e ehemplonan mas cu cla ta e acuerdo entre KPA y Respaldo, y despues tin cu bin mas acuerdonan. No tin un acuerdo, por ehemplo, entre ambulance y brandweer, etc.etc. Nos tin cu zorg pa e acuerdonan aki pa ora nos yega na asistencia nos sa ken ta haci kico. Esey ta e parti importante, inclusive den e parti social”, Lito Lacle a señala.
El a reitera cu stakeholders, sindicatonan y gobierno mester sinta hunto pa eigenlijk yega na cierto maneho pa cu esakinan.
