Caso serio riba Diaranson marduga
- Tiro a lanta hopi fo’i soño na Tarabana
- E ta interna den situacion critico na Hospital
ORANJESTAD (AAN): Sonido di tiro a interumpi soño di varios habitante na Tarabana, tiki pabao di WVB Boulevard. Esaki a socede Diaranson alrededor di 3:00 am, y poco despues yamadanan a drenta na Central di Polis cu un hoben masculino a ser tira na un adres na Mandolinstraat. Esaki ta e caya di banda di Pacifico Restaurant bay nort.
Inmediatamente unidadnan di Polis a ser manda pa e lugar, y tambe Centro di Alarma a despacha un Ambulans cu a sali for di nan sede na Wayaca.
E prome unidad di Polis cu a yega, a bin prepara por si acaso e agresor cu e arma ainda ta eynan. Pero nan a bin tuma nota cu berdad tin un victima kende a ricibi un impacto di bala den lomba. E herida tabata sangra profusamente.
Unidad di Ambulans a yega, y Paramediconan a mira e urgencia di e caso, y a dicidi cu ta bay cu ne mesora pa Hospital pasobra aki tin di wordo interveni mesora pa stop sangramento.
Polis a bisa cu e hoben di 20 aña di edad a duna algun informacion riba loke a socede, pero no por a bisa mucho cos mas. Su situacion tabata critico, y despues cu Paramediconan a stabilize un poco, nan a sali cu ne cu urgencia pa Servicio di Emergencia na Hospital.
Polisnan a seya e area, y a pidi presencia di Recherche di Oranjestad, y tambe team forensico di BFTO pa haci demas investigacion tecnico.
Vocero Liliana Rasmijn a indica na DIARIO, cu te cu Diaranson merdia, e situacion di victima ta critico, pero toch stabil. El a bisa cu Polis ta pidi cualkier persona cu a mira algo of sa di algo, pa yama e Tipline di Polis na 111-41 y duna detaye. Corda cu nan ta garantiza cu bo ta keda anonimo.
