Tin plannan na caminda pa atende cu e Wardanan di Polis cu ta den mal condicion

Rodney Solognier, Presidente di SPA:

ORANJESTAD (AAN) Den entrevista cu Matutino DIARIO, señor Rodney Solognier a elabora tocante e Wardanan di Polis cu ta den mal condicion. Por ehemplo, e oficina na Balashi su departamento di trafico a muda pa Savaneta.

   Solognier a splica cu e mes no a bay personalmente eynan, pa wak con e situacion ta na pia di trabao, pero e ta spera cu ta bon. El a muda pa Savaneta na un lugar nobo completamente drecha, y esun na Balashi actualmente ta cera. El a expresa cu e ta bay papia cu e minister y e ta spera cu nan por drech'e pa no bay perdi tampoco.

   “Tocante di Rijbewijs mi ta spera cu muy pronto nan lo muda pa Doc Opleiding na Playa, conhuntamente cu nan otro coleganan di Rijbewijs.

   Esun di Santa Cruz, lo wordo haci bashi, pero tampoco mi tin un contesta kico ta bay pasa”, Solognier a bisa, agregando cu e lo puntra minister tocante esey, p’asina ey wak si ta bay tin un areglo of un reconstruccion di e edificio, pasobra no por laga e joyanan aki di edificionan bay perdi, tampoco.

“Pa loke ta school di polis tambe ta riba pipe plan. Poco dia e tabata tey cu e otorgamento di diplomanan, y e tabata un tiki tristo. Mi a compronde cu e ta den planning pa wordo reconstrui. Segun plannan bieu nos a palabra pa hinca e opleiding, of parti di dje, den ex-Codemsa, pero mi no por papia di dje aworaki, pasobra tin plannan nobo, y mi no sa si esey ta bay conta si of no. Dia cu nos sinta cu e Minister y e Arkitecto, mi ta supone e ora ey  nos ta wak un ke otro, kico ta bay wordo poni y kico no”, Rodney Solognier, Presidente di SPA a indica.

   Solognier a agrega cu aworaki tin un comunicacion basta bon cu e minister di husticia, nan ta sinta cada dos siman, y e ta kere cu pa e siguiente reunion esaki ta un bon pregunta. Pero si, Scol di Polis ta den planning. Tabata tin un presupuesto for di Gobierno pasa pa traha riba dje, y no a wordo haci, e no sa e motibo pero e ta poni pa cuminza, segun Rodney Solognier.