Altocomisario Arnhem:
ORANJESTAD(AAN): Recientemente DIARIO a entrevista Alto Comisario Ramon Arnhem y a puntre tocante e problema cu tin na Aruba di arma di candela y e falta di bulletproof vests.
El a splica cu e sa cu tin armanan di candela den circulacion, pero e tin hopi confiansa den Cuerpo Policial y den su coleganan. “Tras di cortina sin cu hende ta wak, nos ta trahando riba esaki, nos tin hopi informacion y nos ta actua hopi sin cu hende ta wak kico ta tuma lugar”. Nos ta implementa diferente strategia, pero esey no ta kita afo cu ainda nos ta desea di haya nos bulletproof vests, segun e Alto Comisario.
El a splica cu tin diferente comision trahando riba entre otro e criterionan pa scoge cua tipo di vest lo bin cune. “Ora cu nos tin e vest e ta mehora seguridad y tambe e sentimento di seguridad pa mi coleganan”.
Ya tin varios arma den circulacion, pero cu e informacion cu nos tin nos lo yega cerca bo y kita bo arma, segun Arnhem. A puntra e Alto Comisario riba e hecho cu ta wordo bisa cu polis no ta tuma e problema di arma suficiente na serio y no ta tuma suficiente accion. Arnhem a splica cu polis tin un plan di accion, pero e parti bon ta cu tin indicacionnan cu criminalidad na Aruba a baha. “Ta berdad cu tin armanan den circulacion, pero nos tey pa controla y actua”. Nos tin un bista skerpi riba locual ta sosode y nos no por preveni tur cos, pero nos Cuerpo Policial ta hopi skerpi, nos ta wak hopi y nos ta preveni hopi, segun Arnhem.
