Teenager cu a ricibi un puñal grave a core yega pidi auxilio na Coba Lodo

Polis a detene agresor den accion relampago na Sportboys

ORANJESTAD (AAN): Diaranzon mainta un posible discusion entre dos teenager den area di Angochi, diripiente a escala ora cu uno di nan a haci uso di un arma blanco, y cu tur su forza a puñala e otro persona cu esaki na su curpa.

   E victima a haya dolor inmenso mesora, y a cuminza sangra manchando tur su paña!  Como reaccion natural di e acto aki, el a cuminza core pa su bida pa evita di haya mas hinca, y a dicidi na mobiliza pa ranca careda den direccion di un lugar unda e ta sigur cu hendenan lo por dune yudanza y yama Ambulance pe.

   Pero mas e ta core, ta mas rapido su curazon ta bati.  Consecuentemente mas rapido e herida tabata sangra y dolor ta intensifica.

   Core yega na Supermarket: Asina el a yega na e cruzada-T di caminda di Coba Lodo cu ta cruza pa e caminda pa Angochi.  El a yega dilanti e adres Coba Lodo 2-E, unda tin e negoshi di Shun Lin Supermarket (cu antes tabata conoci como Bay Yun Supermarket di Coba Lodo).

   Personanan eynan cu a mira e teenager masculino aki tur na sanger y visiblemente den shock, a core yama Polis.

   Vocero policial Liliana Rasmijn a confirma cu pa exactamente 11:58 am e prome yamada a drenta, indicando cu un hoben a caba di yega tur na sanger, y cu herida serio na su curpa.  Inmediatamente unidadnan di Polis di Santa Cruz a wordo manda pa e Supermarket aki na Coba Lodo, y Centro di Alarma a ser avisa pa manda Ambulance cu urgencia.

   Situacion grave di hoben: E prome unidad di Polis cu a yega, a nota cu e teenager ta den situacion grave, cu un herida basta severo na su curpa cu ta sangra profusamente.  Polis a logra saca informacion clave di e hoben di loke a caba di pase.  Mesora a seya e area full rond di e Supermarket pa conserva cualkier pista.

   Ora cu Ambulance a yega, e Paramediconan a traha inmediatamente pa trata na reduci e sangramento lo mas posible, y como cu e herida aki lo por a afecta organo paden, a dicidi na mobiliza cu urgencia rumbo pa Hospital, y pidi Servicio di Emergencia pa prepara pa e caso urgente aki.

   Mientras tanto, Polis a pidi presencia di Recherche di Santa Cruz pa yega na e lugar, y a pidi personal forensico di Departamento di BFTO tambe pa yega eynan pa haci analisis di e lugar, sacando potret.

   Buskeda a start mesora: Mientras tanto cuatro unidad di Polis a yega na e Supermarket na Coba Lodo pa asina intercambia di informacion di loke a caba di socede.

   Como cu e caso aki ta uno serio, pues lo por wordo poni como intento di asesinato, e oficialnan di Polis tabata enfoca e ora riba e meta pa busca e agresor cu e momento ey ainda ta liber.

   Danki na e hecho cu Polisnan a ricibi nomber di e agresor, a dicidi pa subi caya den e area pa busca e hoben.  A busca e lugarnan tanto na Coba Lodo como tambe na Angochi unda e lo por a bay sconde.

   Aki nan a controla e.o. e area di veld di futbol di SV Arsenal, tambe a check tiki panort na e veld di futbol di SV Caravel, y finalmente mas panort, esta 655 meter leu for di e Supermarket na Coba Lodo a bay check na e veld y compleho di SV Sportboys di Angochi.

   Poni den man di Polis JZP: Polisnan a canta bingo, ora cu nan a bin topa cu e hoben cu ta cuadra cu e descripcion!  Unidadnan di Polis a rondone y a gare mesora y pone su mannan na boei.  E detencion aki a socede menos di 40 minuut despues cu e prome informe di hincamento a drenta na autoridadnan.

   Inmediatamente a hibe pa Warda di Polis na Macuarima, unda awor e interogacion lo bay involucra personal di Polis JZP (Jeugd- en Zedenpolitie) cu ta encarga cu asunto di hobennan menor di edad.

   Un bon trabao di Polis pa na un forma relampago a gara e agresor asina rapido!

   Cualkier persona cu por a mira loke a socede, ta ser pidi pa yama Tipline di Polis na 111-41 pa duna detaye.

   Te na ciere di edicion, no a ricibi ningun informacion nobo di e condicion di e teenager victima na Hospital.