Caso serio den fin di siman
ORANJESTAD (AAN): Tabata Diadomingo marduga pa 1:55 am, cu un unidad di Polis a ser manda na Servicio di Emergencia na ImSan pa check asunto cu un persona a yega eynan cu tiro na su pecho, di cual e bala a drenta y sali otro banda. E persona ta ricibiendo trato medico eynan.
Polis a yega y a papia cu e victima, kende a bisa nan cu el a wordo tira cu un arma di candela, y motibo di esaki ta debi cu el a pidi pa haya placa pa gasolin.
El a splica cu el a palabra di antemano cu dos persona, cu e lo hiba y duna nan un lift pa Playa, tanten cu nan dune placa pa gasolin pa su auto. Despues el a bisa e personanan aki cu e no kier keda mas na Playa, y pa nan bay bek San Nicolas.
Na San Nicolas e mester a hiba e hobennan aki na diferente lugar. El a bolbe puntra e hobennan pa placa pa gasolin. Aki diripiente e hobennan a cambia nan deal, y no kier a dune placa pa gasolin, y diripiente a rek y dal e cu un mokete net bao di su wowo robez, y despues un di e hobennan a los un tiro den su pecho banda drechi.
Despues di a ricibi e tiro, e homber a rek careda bay na pia den Bernhardstraat, y el a logra para un auto cu a pasa eybanda cu hende desconoci aden, kendenan a core dune lift pa ImSan, unda mesora nan a core bay cune paden pa atende.
Polisnan a core pone Recherche di San Nicolas, como tambe personal forensico di BFTO, y Bureau Slachtofferhulp pa duna un man.
Esnan cu tin mas detaye di e tiramento aki na San Nicolas, por yama Tipline di Polis na 111-41 pa duna informacion.
