Liliana Rasmijn, Vocero Policial:
ORANJESTAD (AAN)-- Vocero Policial, señora Liliana Rasmijn, den entrevista cu Matutino DIARIO, a declara cu e reaccion y interes pa drenta Scol di Polis ta hopi bon, y ainda tin algun dia mas pa inscribi.
Tambe tin hopi scol cu ta pidi pa charla tocante e trabao di polis, y esey e ta pas’e over pa scol di polis, unda nan ta combina e temanan, pa lanta un poco mas e interes den nos hobennan pa bira polis.
-NA SCOL DI POLIS MES:
Rasmijn a bisa cu pa entrega e solicitud tin te cu dia 5 di Juni proximo, na Scol di Polis, na Fortheuvelstraat (San Nicolas), di Dialuna pa Diahuebs, di 9’or di mainta te cu 6’or di atardi.
REKISITONAN:
“Si bo tin tur e rekisitonan cu nan ta exigi, djis pasa yena bo formulario, y si bo tin algo cu falta, di biaha nan ta bisa bo eynan”, Liliana Rasmijn a subraya.
E exigencianan ta, edad entre 17 cu 34 aña, nacionalidad Hulandes, ta inscribi y biba na Aruba, diploma di MAVO, EPI of EPB doorstroom, y tin un haltura di minimo 1.60 meter. Djeynan caba nan ta wak tur bo papelnan y cuminzando nan ta bisa bo si tur cos ta suficiente”, Liliana Rasmijn a duna di conoce.
BON PRESENTACION:
El a haci un remarca cu ora di entrega e solicitud cu e rekisitonan, mester bay nechi bisti. “Pasobra hopi biaha bo ta mira e muchanan ta cana kibra den slof, y short. No. Bo ta aplicando pa un trabao, berdad ta un scol di polis, pero bo ta bay pa bo profesion. Wel, mescos cu bo ta bay aplica pa otro trabao, bo ta bay nechi, so wel mucha homber of mucha muher”, Liliana Rasmijn, vocero Policial a remarca.
