Pelea grandi cu detencion na Softball Interinsular na Veld di Kudawecha

ORANJESTAD (AAN): Diahuebs atardi riba Dia di Ascension, tabatin weganan di Copa ABCS Softball tumando lugar na veld di Kudawecha.

   Pero prome cu e wega entre team di Aruba vs. di Corsou por a finaliza, urgi un problema formal entre ambos team, y mesora dugout di ambos banda a bira bashi ya cu tur hende a subi veld.

   Testigonan a splica cu tur cos a cuminsa na momento cu un umpire a cambia un decision di Primera Base.

   E teamnan cu a enfrenta otro tabata RedSkin di Aruba y Swift di Corsou.

   E problema a start, momento cu a dal un persona di edad di e team di Corsou. Esey por bisa tabata e mecha cu a crea henter e dolor di cabes cu a sigui.

   Parse cu e persona cu a dal prome ta esun cu por a wordo mira riba e video cu a bay viral ariba suela riba e veld.  E peleanan tabata intenso, y a shock publico di cual varios di nan a dicidi pa no sigui mira wega mas, y a baha cu nan yiunan di tribuna y a bandona e lugar y no kier a mira mas.

   Yamadanan na cantidad a drenta na Central di Polis, y mesora tanto unidadnan di Polis di Noord y varios otro distrito a acudi na e lugar.  Basta polis mester a presenta pa calma e situacion, y Ambulans tambe tabata necesario, unda cu mester a atende dos persona herida, di cual un a bay Servicio di Emergencia na Hospitaal.

   Polis a logra acumula detaye, y na final un hungado a wordo deteni pa maltrato.  E investigacion riba e bululu aki lo sigui, no djis cerca Polis, pero tambe cerca e organizadornan di e Copa ABCS aki.  No ta conoci si e dos teamnan aki lo bolbe topa pa termina e wega.