Liliana Rasmijn, RP di KPA:
ORANJESTAD (AAN) Liliana Rasmijn, Relacionista Publico di Cuerpo Policial, a sigui splica den entrevista cu Matutino DIARIO, cu tin caso di persona 18 luna cera, como portador di arma di candela ilegal, y KPA ta purba target e hobennan pasobra nan ta Aruba su futuro, y nan ta duna nan un chens mas. Nan ta mara na e parti di Reclassering, pa ora nan sinta nan castigo nan ta haya chens di bin bek den comunidad.
“Nos ta haci un apelacion un biaha mas. E no ta un tema popular, pero uno cu hopi hende no kier papia di dje, pero bo ta wak na e tips cu ta bin na 111-41 con nos ta yega na personanan cu tin arma di candela. Siman pasa, manera por a wak, nos tabata tin detencion, na unda den menos di un siman ya tabata tin un sentencia di dos luna caba. Y corda bon, e tabata pa dos arma di candela. Pero el a cay den e parti di hoben, Pesey e castigo tabata un tiki mas abao”, Rasmijn a indica.
El a añadi cu nan ta un proyecto unda cu diferente persona di diferente departamento ta traha hunto, tanto di KPA y di Ministerio Publico, na unda nan ta traha duro pasobra nan sa kico ta e consecuencia di carga un arma di candela ilegal.
“Pues, mi ta haci un apelacion un biaha mas. Bo tin te dia 24 di Mei pa deposita sea e arma di candela, e por ta un pieza, e por ta un municion, bo ta keda anonimo”, Vocero Policial Liliana Rasmijn a reitera.
