SUV electrico envolvi den otro accident na Tamarijn

Mesun Diamars anochi

ORANJESTAD (AAN): Diamars anochi tabatin en total 2 accident riba caminda di Tamarijn.

  Esaki ta e di dos cu a socede na Tamarijn.  Tabata e mesun Diamars anochi durante cu patruya di Polis di Santa Cruz tabata atendiendo un accident cu hende herida riba caminda di Tamarijn pa Sero Pita, a sosode un otro accident mas o menos 1 kilometer mas leu.

   Habitantenan a core sali, ora cu nan a scucha e impacto aki.  E accidente a sosode na e crusada cu ta bay pa Scol di Ayo.

   Aki un vehiculo SUV Electrico, di marca Neta y modelo U-Pro, cu number A-74708 a subi caminda, mientras cu un auto compacto Suzuki Swift cu number A-32016 tabata bayendo nort cu velocidad.

   Debi na esaki, e Suzuki Swift a dal den e porta di e chauffeur di e Neta U-Pro.  E auto aki a bay den scual y pega pariba di caminda contra algun baranca grandi.  Mientras cu pa algun centimeter e Swift a scapa di dal contra un palo di luz cu tin banda pabao di caminda.  Chauffeur a purba evita di dal den e palo di luz cu tin transformer riba dje, pero na final a bay dal contra cura di e cas Tamarijn 1.

   Ambulance a wordo pidi pa controla chauffeur di e Suzuki Swift pa check posibel golpi na su nek y cabez.  Tambe nan presencia ta pa controla e hoben cu tabata stuur e Neta.

   Na final tres persona a wordo atendi door di Paramediconan.