Speedboat Go-Fast cu 297 kilo di cocaina intercepta pabao di Aruba

Marina Hulandes tambe a coopera den e accion

• Guardacosta Colombiano finalmente a captura nan
• Armada di Colombia: E droga tabata rumbo islanan ABC 

ORANJESTAD (AAN): Un operacion hunto haci door di Marina di Colombia, y Marina Hulandes, a logra intercepta un speedboat tipo Go-Fast cu tabata moviendo riba lama pabao di Aruba, y tambe panort di Colombia.  Esaki ta basta leu panort di costa di La Guajira na Colombia.   Abordo tabatin yen di bulto conteniendo pakinan di cocaina.

   E accion y persecusion aki a start, den cuadro di trabaonan di vigilancia y di siguridad maritimo di Forza Naval di Caribe.  Ta un avion di vigilancia a detecta e speedboat aki alehando di costa di Colombia y pasando riba lama grandi pabao di Aruba.  Despues tanto un avion Naval di Colombia a detecta esaki, y tambe e avion Dash-8 di Wardacosta di Caribe Hulandes.

   Unavez cu a detecta e speedboat aki cu precision, a saca un unidad di Reaccion Rapido di e stacion di Guardacosta di Santa Marta, cu a bay den direccion di e speedboat aki, y ricibiendo update constant di avion bulando basta halto.

   Ora cu esnan di e boto a mira cu autoridad ta yegando cerca, mesora nan a cuminza busca forma pa desvia di nan, y asina un persecusion a cuminza.  Autoridad a uza nan experiencia y armamento pa asina a stop e boto, y finalmente tur cuatro tripulante a hisa man y rindi nan mes.

   Autoridad di Colombia a bisa cu tur cuatro persona ta di nacionalidad Venezolano, y e boto a sali for di Colombia direccion pa un pais den Caribe.

   Abordo di e Go-Fast a bin haya 12 bulto grandi, conteniendo 297 paki lora den plastic.  Riba lama mes a haci test cu e droga, y el a test positivo pa cocaina.  E cargamento aki tabatin balor di mas di 13 miyon Dollar, segun autoridad a indica.

   E droga y e detenidonan a wordo treci bek pa Colombia, y nan a wordo entrega na Polis Nacional pa por sigui cu e investigacion, y proceso hudicial.

  Potretnan aki pa cortesia di Armada de Colombia.