Dama Hulandes hoben a muri den accident fatal cu UTV

Diadomingo atardi pariba di Prizon KIA...

• El a bira e di 10 morto den trafico 

ORANJESTAD (AAN): Tabata Diadomingo pa exactamente pa 2:58 pm, cu diferente yamada a drenta na Centro di Alarma pa raporta un accident pisa.

   Na su turno, Centro di Alarma a core notifica Central di Polis pa un accident riba e caminda di Grapefield na San Nicolas.

   E prome unidad di Polis di San Nicolas cu a yega, a topa cu un vehiculo UTV cu a accidenta, y un di e personanan, un dama hoben tabata mustra hopi grave, y pesey a core pidi pa Ambulans yega cu maximo urgencia.

   Polis a check y nota cu e UTV aki coriendo riba pida caminda off-road pariba di Prizon di KIA, debi na un of otro maniobra a bolter.  E dama herida a resulta di ta e chauffeur, y Polis a mira cu su condicion ta grave.

   Ambulans di ImSan a yega, y mesora Paramediconan a bay check señalnan vital, y asistencia medico.  Pero lamentablemente no por a haci nada mas p’e.  A informa Polis pa manda busca un Dokter.

   Dokter Forensico di Polis a presenta y ta constata morto di e hende muher Kimberly van Ardenne, naci dia 1 di November 2002 na Hulanda, pues e tin 23 aña di edad.

   Polis a pidi pa Specialista di Trafico di KPA yega, hunto cu e team forensico di BFTO pa documenta tur esaki, y tambe a busca personal di Bureau Slachtofferhulp.

   Cu e fayecimento di e hoben Hulandes aki, lamentabelmente esaki ta bira e di 10 morto den trafico pa aña 2026.  Na final ta Agencia Funeraria a bay cu shersh pa busca e restonan mortal.

   DIARIO y tambe Cuerpo Policial Aruba ta manda palabra di condolencia na famia di e fayecido.