ORANJESTAD (AAN): Vocero Policial a confirma na prensa, cu siman pasa autoridadnan hudicial di Aruba a logra a detene un homber sospechoso,
kende no por a domina su mes durante un caso conoci como ‘road rage’. Bon mes cu un video a wordo graba di e incidente aki, cu a pone pueblo bira furioso, y el a hala atencion di autoridad hudicial tambe.
E caso mes a socede riba un Diabierna, 15 di Augustus 2025 riba e caminda di Kibaima pa Cunucu Abao. E caso a socede poco pabao di un T-weg na Pos Abao. Den e caso aki, un pober chauffeur femenino di 74 aña di edad, a bira victima di violencia fisico.
E incidente a tuma lugar riba caminda publico na Pos Abao, unda e sospechoso coriendo un Pickup, a cera e chauffeur femenino cu auto, no obstante trafico ta druk, e homber a baha y siguientemente dal’e varios biaha.
Diferente hende riba caminda tabata testigo di e sucedido. Un ciudadano a hasta purba pa interveni pa proteha e victima femenino.
Polis a tuma e caso cu seriedad y a habri un investigacion mes ora. E sospechoso a keda deteni diahuebs ultimo y presenta Dialuna 8 di September dilanti Huez Comisario.
Violencia den trafico ta inacceptabel! E tipo di comportacion aki ta forma un peliger pa seguridad di tur hende riba caminda y ta worde trata cu firmesa. Incidentenan manera esaki ta worde consecuentemente investiga.
