Entrante 1 di october
ORANJESTAD (AAN): Den e conferencia di prensa dialuna mainta hunto cu Departamento di Impuesto, vocero di Polis señora Liliana Rasmijn a splica cu entrante prome di october proximo Polis lo intensifica control riba plachi di number di vehiculonan di motor. Awo cu tin fecha stipula, lo tin mas visualidad pa e plachi di number valido y lo por haci nan trabou di controla miho.
Ya caba desde juni ultimo cu tur impuesto di vehiculo di motor mester ta paga, Polis ta controlando aunke cu no tin e plachi di number valido riba e vehiculo. Cuerpo Policial ta gelink na Departamento di Impuesto y ora di para un auto ta haya informacion si e number ta paga of no.
Te ainda tin hopi vehiculo di motor cu no tin nan plachi di number riba nan auto pero nan tin comprobante cu e ta paga y ta wardando riba un cita pa busca esaki. Pero entrante prome di october, segun DIMP a anuncia, esaki lo no ta bay ta e caso mas pasobra pa e fecha aki tur vehiculo lo mester tin e plachi di number blauw cu inscripcion blanco, esta e plachinan di number 2025-2029.
Señora Rasmijn a agrega cu e plachinan mester, segun ley ta stipula, ta pega dilanti y patras na a auto y no riba windshield y niun otro caminda den e auto. Esaki ta conta tambe pa autonan nobo of cierto modelonan di auto cu no ta bin cu buraco pa schroef e plachi di number na dje.
Tambe ta controla plachi di number falso y si e plachi di number ta cuadra cu e vehiculo cu ser para pa Polis. Hopi biaha ciudadanonan ta uza e mesun number riba dos vehiculo haciendo tambe asina cu e seguro no ta cuadra. Y pa esaki tambe tin multa.
