Riba Diabierna so Polisnan a controla 800 vehiculo di motor

Total di 332 boet a cay --- ORANJESTAD (AAN): Como cu ta fin di luna, di basta dia caba a duna advertencia cu Polis ta bay ta haciendo extra control den tur skina na Aruba. 

Ademas di controla negoshi y clubnan nocturno, nan a haci un extra control riba trafico.  Pa check si tur automobilista ta cumpliendo cu documentacionnan, y si acaso no tin coremento burachi.

   Vocero di Polis, Liliana Rasmijn a confirma na DIARIO cu Cuerpo Policial riba Diabierna anochi pa Diasabra madruga, a para mas cu 800 vehiculo di motor y a parti mas cu 332 multa durante control policial.

   Diabierna desde 4:00 pm te den oranan di Diasabra madruga, polis tabata tin control full rond di Aruba.  Den cada distrito nan tabata presente, bao guia di supervisornan y demas halto autoridad.

   Segun Rasmijn, mas cu 800 vehiculo di motor a wordo controla.  Esaki ta encera entre otro Auto,  Brommer, Scooter, y hasta Bus y a reparti mas cu 332 multa.  Aki a controla e asina yama ‘Party Bus’ tambe.

   Polis a bisa, cu durante e control grandi aki di Diabierna 29 di October, nan a detene 9 persona indocumenta, y cu no por a splica ki tempo nan a drenta Aruba.  Nan a wordo deteni, y a ser pasa pa e departamento di Guarda Nos Costa.

   Durante e controlnan aki, Polis a bin topa cu algun chauffeur cu tabata mustra di ta bao influencia di alcohol, esta nan wowo ta cora, ta papia cu lenga pisa, y ora di a supla riba Alco Sensor IV, esaki a demostra cu nan ta burachi.  Como cu nan a viola Articulo 5 inciso 2 di Ley di Trafico, nan a wordo deteni pasobra ta maneha auto bao influencia di alcohol.

   Chauffeurnan tambe cu a wordo pidi pa mustra nan rijbewijs, pero no por a haci esaki, tambe a keda deteni.  Boei a wordo poni riba nan man, como cu nan a viola Ley di Trafico pasobra a maneha auto sin rijbewijs.

   Vocero Rasmijn, a indica na DIARIO cu e anochi pa madruga aki, nan a confisca diferente vehiculo di motor, diferente auto, y entre nan dos Bus.  A haci uso di diferente compania di takelwagen pa hiba nan pa Warda di Polis.

   Algo serio ta cu durante e control Policial, a listra den autonan y a confisca droga y arma blanco.  Cada uno lo haya un rapport traha riba e asunto.

   Control riba negoshinan: Polis tambe a tene control riba Diabierna anochi riba e horario cu e negoshinan mester ta sera y si ta cumpli cu e regla- y protocolnan stipula pa cu DVG pa mitiga brote di Coronavirus.

   Den esaki, nan a controla un total di 16 supermarket como tambe 33 Bar y of Restaurant.

   Controlnan a sigui Diasabra anochi y esey por lesa den otro relato.  Cuerpo Policial ta recorda tur hende pa wak pa bo documentonan di vehiculo di motor ta na ordo. Si bo ta bebe no stuur y si bo ta stuur no bebe. Corda riba e medidanan di DVG cu ta na vigor.