ORANJESTAD (AAN): Un tiki mas cu 11 luna pasa, esta un Dialuna anochi 16 di November 2020 cos tabata basta keto den bario di Monserat.
Algun testigo diripiente algo prome cu 8’or di anochi a mira dos suheto hopi sospechoso para riba Riberostraat, cu ta e caya cu ta core for di Palm Beach, pasa door di Monserat y caba casi na Kamay.
Diripiente un ciudadano a yama Polis pa avisa cu tin hende sospechoso riba Riberostraat, pues e caminda di Monserat, net pafo di ‘He Market’, cu ta un supermarket.
Mientras cu ta wardando yegada di Polis, diripiente e dos personanan sospechoso aki bisti cu hoodie riba nan cabez, cu cara e biaha aki tapa, a cana bay na e porta di entrada di He Market, dal esaki habri y bay paden.
Nan a menaza e cashier Asiatico y a obliga pa e entrega tur placa cu tin den caha. Aki e persona a duna nan un suma di como 1.000 Florin. Despues di esey, e dos delincuentenan a sali bek di e supermarket, y ranca un careda bay direccion pariba pa Casnan di Pueblo Noord. Mesora a core bati alarma cu atraco a caba di wordo cometi.
Mesora Polisnan a yega na e area, como tambe personal di Atraco Team, pa haya e prome detaye. Algun agente di Polis a cuminza core den Casnan di Pueblo, y den Semeleerstraat a detene un hoben di 19 aña e anochi ey, pero el a resulta di ta inocente. Security Camera video a establece cu e no ta envolvi, y autoridad a ofrece disculpa y a lage den libertad.
Como cu esnan na e Supermarket a keda hopi spanta, a hasta yama Slachtofferhulp pa duna asistencia.
Pa Atraco Team, e hecho cu tin Security Video Camera di bon calidad graba, a yuda nan cuminza investiga e caso aki. El a dura 11 luna, pero poco-poco a realiza cu e atracadornan aki no ta di e area di Noord ni di Monserat. Asina poco-poco a keda haya detaye y tip, cu a cuminza pone nan wowonan bay riba distrito di Brazil.
Despues di a aglomera suficiente detaye, riba Diasabra madruga, Atraco Team cu sosten di Polis a tene un razzia di sorpresa na un cas na Brazil. Aki a bin haya e sospechoso ainda na soño y a bay cune.
Vocero di Polis Liliana Rasmijn, a confirma na DIARIO cu e hoben deteni ta di inicial S.W. di 19 aña naci na Aruba. E ta e sospechoso principal di e atraco cometi na He Market na Monserat.
Lomba sunu mes el a wordo transporta pa Warda di Polis, pa asina e interogacion y investigacion por sigui.
Polis ta keda enfatiza, cu ciudadanonan cu por tin mas informacion, por yama Tipline di Polis na 111-41 y corda cu nan ta garantiza cu bo ta keda anonimo.
