Renobacion di warda di polis di Noord a keda cla

Minister Rocco Tjon a anuncia: *Plaza Tino Ruiz pronto lo bira un realidad

ORANJESTAD (AAN):  Dialuna mainta, Minister di Husticia Rocco Tjon a ofrece un conferencia di prensa pa asina duna algun anuncio relaciona cu e renobacion di Warda di Polis Noord.

            E mandatario a cuminsa bisando cu esaki ta un proyecto hopi importante principalmente pa Cuerpo Policial. E proyecto ta consisti di tres parti.

            Relaciona cu e trabaonan cu mester sosode na e warda di polis na Noord, esaki ya caba a inicia algun tempo atras, pero no a duna mucho atencion na esaki. Mirando e hecho cu e trabaonan a termina, toch kier a para keto un rato cerca e parti aki di e proyecto, a indica.

            Tjon a sigui bisa cu siman pasa a aproba e siguiente fase di e proyecto aki cu ta e Plaza Tino Ruiz (den feliz memoria). E proyecto pa traha e busto di Tino Ruiz ya caba a inicia y ta den su fase final. Artopia ta trahando riba esaki, a laga sa y otro luna e busto lo wordo treci na Aruba.

            E Plaza aki lo ta situa na e parti dilanti di e warda di Polis na Noord y eynan e busto lo wordo poni.

            E renobacion di warda di polis di Noord a keda cla y tur e trabaonan paden y pafo di warda a tuma lugar. Aworaki e parti pafo, esta e Plaza Tino Ruiz, fin di luna aki, DOW lo inicia e destaho y despues e partido cu gana e destaho lo inicia cu e trabaonan y lo ta rond di 50 dia di trabao pa e plaza por bira un realidad, e minister a indica.

            E ora ey e busto lo ta na Aruba caba y lo por inaugura Plaza Tino Ruiz, dilanti di Warda di Polis na Noord.

            E proyecto aki na un inversion di alrededor di mey miyon florin, Minister Rocco Tjon a indica.