Caso serio marduga na Saliña Cerca
ORANJESTAD (AAN): Tabata Diadomingo marduga pa 4:20 am, cu e yamada urgente a drenta na Central di Polis. E yamada a bin for di un adres na Saliña Cerca, unda ta informa cu un atraco a caba di socede na e cas ey.
Inmediatamente unidad di Polis di Noord, y varios patruya mas a wordo mobiliza den e direccion di Saliña Cerca, cu ta e area situa mey-mey di Kamay cu Bakval y Boroncana riba caminda di Noord pa Westpunt.
Hopi informacion no a wordo suministra den e prome yamada, y pesey tabata importante pa e prome unidad cu yega na e adres, por duna extra detaye pa tur otro unidad di Polis cu ta coriendo rond den diferente distrito.
Ora cu Polis a yega na e cas, nan a bin topa cu un famia ainda den panico pa loke nan a caba di pasa aden. E doño di cas ta un ciudadano cu ta kedando eynan cu su nietonan.
Pues e welo a bisa Polis, cu den e marduga ey un atracador a yega nan cas, y den bon Papiamento a bin menaza nan cu un arma di candela. Usando esaki y bao di presion inmenso, e tabata menaza e welo y exigi pa e dun’e placa.
Sinembargo e welo tabata bisa cu e no tin placa, pensando cu kizas e atracador lo bay. Pero e atracador kizas sa cu e welo tin placa masha bon, y a sigui exigi y pone mas presion.
Mirando cu e no ta yega leu cu e welo aki cu ta resisti y no cumpli cu su demanda, e atracador a opta pa haci e situacion mas peligroso y tenso, door di bay busca un di e nietonan cu ta drumi na e cas, rek bin cune dilanti, y usa e hoben aki pa forza e welo entrega placa.
Ora cu esaki a socede, e welo a mira cu e seriedad di asunto a bira uno drastico. E ora e welo a baha cabez, y a dicidi cu bida di nieto ta mucho mas precioso. E ora e welo a hay’e obliga na bay den cashi, gara e placa, y entrega esaki na e atracador.
Di e forma ey e atracador a bay cu un suma di mas o menos 7.000 Florin.
Despues di esey e atracador a bandona e cas. No tin informacion si acaso a mira si el a subi auto, of a djis bandona e area na pia.
Polis a nota cu e muchanan y e welo tabata hopi spanta ainda, y a dicidi na pidi yudanza mesora di Bureau Slachtofferhulp.
Mesora a pone Atraco Team na altura, y a pidi oficialnan forensico di BFTO tambe acudi na e lugar pa asina check vingerprint, y tur detaye cu lo por haya na e cas.
Autoridad awor ta bay check e area pa mira si por tin otro cas cu lo tin Security Video Camera cu por a capta e suceso y check si acaso e atracador a huy den auto of na pia.
Vocero di Polis, Lito Lacle, ta pidi cualkier persona cu por a mira esaki socede, of a nota algo sospechoso banda di 4:20 am na Saliña Cerca, pa yama Tipline di Polis na 111-41 y duna informacion. Corda cu nan ta garantiza cu bo ta keda anonimo.
