Recherche Cham a baha cu pensioen

ORANJESTAD (AAN): Recientemente diferente oficial hudicial den Recherche di Cuerpo Policial for di diferente distrito,

na un forma secreto a prepara un dia ameno pa sorprende Recherche Cham.

   Esey ta debi na e hecho, cu despues di a sirbi comunidad pa 45 aña, oficial Gary Cham ta baha cu pensioen.

   Sr. Cham mes no a premira cu lo tin un sorpresa p’e.  Cu inmenso alegria el a yega y bin descubri e sorpresa prepara door di su coleganan cu a bin hunto pa despedi di dje. Un sin fin di regalo a cay pero tambe a mira back riba e 45 aña di exito y dedicacion di Sr. Cham, cu hopi storia y momentonan bon y tambe dificil.

   En general a bay bek riba su trayectoria largo di Polis, y tambe di tur e Departamentonan unda el a labora.  Hecho ta cu tur oficial di Recherche a describi Cham como un persona colegial pa comunica cune, y esey ta sin duda alguno.

   Masha pabien Sr. Cham y gosa di bo pensioen merecidamente. Cuerpo Policial Aruba ta orguyoso di bo pa bo dedicacion y ta un polis ehemplar cu a sa di sirbi su Pais Aruba dignamente!