Polis a negocia durante 4 ora cu homber dominicano - ORANJESTAD (AAN): Diadomingo pa 11:13 am, Cuerpo di Polis a haya un melding relaciona cu un caso di secuestro na un cas na Tanki Leendert.
Na yegada di e prome patruya mesora a pidi pa e team negociado di Cuerpo Policial Aruba pa asina purba convence dicho persona pa entrega su mes mesora na autoridad.
E informacion cu DIARIO a ricibi ta cu un persona tabata tin un arma den su poder y di e forma aki e tabata tin su pareha como rehen, contra su boluntad, den un camber. Locual ta wordo considera secuestro.
Polis su team special di Aresto como tambe personal di Ambulans tabata na e sitio pa atende cu e situacion y pa e señora por a logra sali for di e camber unda e tabata secuestra.
E negociacion no tabata uno facil ya cu mester a evita cu e situacion for a sali for di man.
E secuestrado a wordo identifica como uno di nacionalidad dominicano y cu su documentonan no tabata na ordo (ilegal) y parce cu e negociacion pa e liberacion a bay rond di status migratorio.
E persona aki parce cu recientemente a wordo gara pa Guarda Nos Costa, pero e lo a huy.
Finalmente, informe di Cuerpo Policial a conforma cu a drenta algun ora despues cu Team di Aresto a drenta na e adres na Tanki Leendert pa asina libera e señora cu tabata wanta contra su boluntad.
Door cu a negocia pa 4 ora, pero envano, a dicidi di uza e Team di Aresto di Polis pa kibra e porta, drenta e camber y aresta e homber di inicialnan J.M.C.B, naci na Republica Dominicana di 34 aña di edad.
