Razzia den Apartamento na Ponton pa detene Dealer peligroso di droga

ORANJESTAD (AAN): Diabierna mainta pa merdia, inespera un cantidad di vehiculo di oficialnan di Seccion Anti-Droga, hunto cu Arrestatie Team, y unidad K9 di Polis a aglomera den Watapanastraat na Ponton.

   Unidadnan di Polis tambe a yuda, y a blokea e entrada di Watapanastraat for di Katunastraat, tambe Barba di Joncumanstraat, y Wabistraat.

   Di e forma ey oficialnan di e seccion ‘Project Team Drugspanden’ a drenta den e tereno cu ta consisti mas dilanti di un Cas y un Negoshi.  Pero Polis no tabata interesa den e habitantenan di e cas, ni di e negoshi.  Pero tabata bayendo pa un persona cu ta biba den un di e Apartamentonan cu tin patras di e cas.  A core cera meter di awa pa evita cu e persona purba flush droga pa deshaci di prueba.

   Aki ta unda cu e funcionarionan a aglomera riba un apartamento, den cual tin un persona cu ta wordo considera hopi peligroso.  Nan a gare y wante prome cu e por a haya chens di sali y huy.  Aki a detene e homber A.J.M. di 28 aña naci na Aruba.  E ta wordo sospecha di ta un Dealer di Droga, y ta bende droga for di eynan mes.

   Mientras tanto, oficialnan hudicial a cuminza ta listra tur su Apartamento y algun otro tambe, pa mira ki prueba extra nan por haya, y kizas tambe droga.  A hasta listra den baki di WC, tambe habri y check freezer.

   Project Team Drugspanden ta un seccion di Cuerpo Policial cu a wordo crea pa entre otro investiga bendemento di droga for di casnan y tambe riba caya.

   E razzia y detencion aki a bin den cuadro di un investigacion cu Project Team Drugspanden ta haciendo pa algun tempo caba, y anteriormente nan a detene un cumprador di droga, y el a basha abao y divulga na autoridad, tur loke e Dealer di Droga aki den Watapanastraat ta haci.  Tur cos tabata mustra cu e persona aki ta un mastermind den droga local, esta cu e ta suministra ‘otro’ rebendedornan cu droga, y posiblemente ta yuda manda droga pa exterior tambe.

   Fotografo di DIARIO a nota cu Project Team Drugspanden a sali cu varios baki yena cu material di prueba.  Vocero di Polis a confirma cu nan a confisca un cantidad di droga, entre otro Marihuana, Ecstasy (conoci como XTC), y Cocaina.

   Awor cu nan tin e sospechoso peligroso aki deteni, e investigacion ta sigui den e caso aki.  Te atardi porfin a habri Watapanastraat bek pa publico.

   Polis ta pidi tur hende nan cooperacion pa asina yuda Cuerpo Policial resolve ma caso, y pesey informacion cu pueblo por duna ta importante.  Cualkier informacion cu bo por duna, por yama Tipline di Polis na 111-41.  Nan ta garantiza cu bo ta keda anonimo.