Colombiano y Arubiano a keda deteni
ORANJESTAD (AAN): Tur cos tabata bao investigacion pa algun tempo caba, y e ta relaciona cu un caso grandi di droga.
E siman aki, e informenan cu a drenta ta asina hopi, cu a consulta cu Ministerio Publico. A base di e investigacion andando pa Unit Narcotica di Cuerpo Policial Aruba, riba Diahuebs a haya luz berde pa tene un razzia den bario di Jucuri.
Vocero policial Liliana Rasmijn a confirma cu riba Diahuebs a tuma lugar un entrada hudicial den e bario di Jucuri y den e accion aki, autoridad a detene un hende homber Colombiano di incial O.D.T.J. di 35 aña di edad. Fiscal Auxiliar a duna OK pa e keda deteni, y mesora a cuminza cu interog’e.
E investigacion a sigui su curso, y Diabierna mainta trempan a tene un otro razzia. E biaha aki e entrada hudicial a socede den Rancho na Playa, y ta relaciona cu e mesun caso.
Na Rancho tambe, a detene un hende homber cu inicialnan J.J.M.G. di 41 aña di edad. Na e lugar, autoridadnan a grita ‘Bingo’, pasobra a bin haya un cantidad grandi di cocaina, marihuana y piedra di droga. Tur esakinan a worde tuma den beslag pa mas investigacion.
E investigacion ta basa riba sospecho di exportacion di droga pa exterior. Segun vocero di Polis, nan no ta descarta cu mas detencion lo cay, y cu lo por tin mas razzia teni door di Unit Narcotica.
Pa esnan cu no sa, Unit Narcotica ta un unidad di Cuerpo Policial Aruba cu oficialmente a worde lanta 1 augustus 2023. E unidad ta investiga tur loke ta bendemento di droga for di casnan, riba caya, delivery, plataforma social y hasta area di hotelnan. Tambe e unidad ta investiga tur droga cu worde intercepta pa Douane, US CBP Customs and Border Protection na aeropuerto, door di ambtenaarnan di KIA y tambe tur droga encontra durante cualkier control policial.
Pa Cuerpo Policial Aruba por resolve mas caso cooperacion y informacion di pueblo di Aruba ta hopi importante, pesey nan ta pidi si bo tin cualkier informacion yama e tipline di Polis cu ta 111-41. Nan ta garantisa cu bo ta keda anonimo.
