Tres ciudadano tambe a keda deteni
*E ta un investigacion di caso penal
*Lo por tin mas detencion pronto
ORANJESTAD (AAN): Relaciona cu un investigacion penal cu funcionarionan di Landsrecherche a cuminza traha riba dje, a yega na un punto determinante, unda cu aprobacion di Ministerio Publico, nan a tene un razzia riba Diasabra atardi mes na un cas den Lopezstraat na San Nicolas.
E caya aki ta situa un poco panort di EPB San Nicolas. Landsrecherche a pidi yudanza di Polis, como tambe team forensico di BFTO pa presenta cu nan na e adres. Pa evita cu situacion por sali for di man, Polisnan a cera e caminda pa asina e oficialnan hudicial por haci nan trabao.
Vocero di Ministerio Publico, Ann Angela a confirma cu Landsrecherche a detene aki un miembro di Wardacosta di Caribe Hulandes, cu sede na Aruba. El a djis agrega cu esaki tin di haber den cuadro di un ‘investigacion penal’.
Ademas di a detene e miembro di Wardacosta, a detene tres ciudadano. Ministerio Publico a splica cu e investigacion den e caso penal aki ta sigui, y no ta exclui cu mas detencion por cay.
Ministerio Publico no a duna ningun detaye ta kico e violacion di ley cu a wordo cometi y cu ta investigando e persona aki. Pasobra nan a indica cu den interes di e investigacion, lo no duna mas informacion pa awor.
Pesey no a ni suministra nomber, ni inicial di e personanan cu a keda deteni.
