Robo grandi den anochi di Diadomingo pa Dialuna
ORANJESTAD (AAN): Dialuna marduga banda di 1:00 am, un unidad di Polis di Noord a ser manda na un adres na Nuñe pa check kiebro den un cas.
Na e lugar, Polisnan a wordo cerca pa e señora di inicial B. El a declara cu el a entrega caba oficialmente keho di ladronicia den su cas. El a splica cu Diadomingo atardi pa 2:30 pm el a bay laga su cas na lock y intacto atras pa asina start su labor.
Dialuna marduga pa 12:40 am el a regresa cas y ora di pasa drenta via porta dilanti, el a mira mesora cu e bentana di cushina y e porta patras ta hancho habri. El a mira cu e cashi di cushina y e cashi grandi den sala ta habri y completamente reboltea.
Pesey aki el a haya sospecho cu ladron a bolbe drenta su cas. Meymey di e sala y cushina, e señora a mira boshi santo cu kizas ta un mancha cu e zapato di e ladron a laga atras. El a mira cu e TV grandi den sala tambe a wordo pusha un banda, y aki tin vingerprint claramente visible riba e screen.
El a sigui controla su cas, y a bin nota cu for di e cashi grandi, nan a bay cu como 350 Dollar y varios charger di Apple iPhone. El a sinti falta di un caha chikito tambe den e cashi di sala.
Yegando den un cuarto di warda cos, el a bin nota cu nan a bay cu un caha di herment color blauw cu preto. Den esaki e tabatin un Grinder preto, un Circle Saw, y un mashin di boor color cora, y tur ta di marca Skill.
Ladron a pasa bay cu kedsnan color blanco cu strepinan preto y cora di marca Puma. El a haya falta tambe di un stofzuiger color oranje y shinishi cu un slang cora di e marca Rigid.
El a yega den camber pa controla, y aki el a haya un holor fuerte di marihuana. Pues ladron a pausa aki y dal un pito. Den camber varios cashi tabata habri, y e camber tabata full reboltea.
Na e mesa di tualet a desaparece un caha color silver y biña cu prenda aden. Den e cahita aki e tabatin 400 Dollar tambe.
E tabatin varios prenda den e cahita aki, e.o. un renchi oro di dede, cu un stenchi geel riba dje y cu su nomber graba aden, tambe un renchi di oro cu un curason riba dje, un renchi di oro cu diamante grandi riba dje, un renchi di oro cu tres diamante mediano, un armband di whitegold cu un diamant riba dje, un cadena di oro, di cual un di e banda ta whitegold y e otro ta jewelgold, un cadena di oro cu dos plachi di oro cu e letter ‘J’ y riba e otra poni ‘Bloedgroep A’ riba dje. Tambe un plachi di oro cu e letter ‘A’, un armband Hindi color oro, un hanger di oro den forma di un cruz, un hanger di oro den forma di strea di David, un hanger den forma di curason, algun renchi di orea di oro cu e letter ‘B’ riba dje.
Tambe a horta un caha blanco, y den esaki e señora B. tabatin un holoshi di man di marca ‘Bedate’, dos holoshi di man pa homber di marca Nixon, di cual uno ta color cora na parti paden, y e otro ta rose-gold. Un holoshi di man di marca Swaroski, un holoshi di plata y preto di marca Movado, un holoshi di man pa muher marca Nixon, un armband Pandora cu como 15 charms, tambe varios renchi di dede di plata, algun renchi di orea di oro estilo hoepel.
Tur e prendanan aki cu a wordo horta tin un balor total di 35.000 Florin. Polis a tuma keho y a cuminza cu un investigacion.
Si acaso abo sa kende diripiente riba Diadomingo anochi of Dialuna mainta tin e mercancianan aki den su poder, diripiente ta cana cu holoshi caro na man, bo por yama Tipline di Polis na 111-41 pa asina yuda autoridad resolve e crimen. Nan ta garantiza cu bo ta keda anonimo.
